Bas múftı juma ýaǵyzyn aıtty (FOTO)
Elimiz boıynsha barlyq meshitte juma namazy oqyldy. Jamaǵat kópten kútken juma namazynda ýaǵyz tyńdady. Qazaqstan musylmandary dinı basqarmasynyń tóraǵasy Naýryzbaı qajy Taǵanuly respýblıkalyq «Áziret Sultan» meshitinde bolyp, jamaǵatqa juma ýaǵyzyn aıtty.
Otbasy qundylyqtary týraly nasıhat aıtqan Bas múftı: «Islamda otbasy qundylyqtaryn saqtaý joldary óte názik sýrettelgen. Islam er men áıel birin-biri tolyqtyryp turatyndyǵyn jáne bir-biri úshin tirek bolatyndyǵyn bekitip, qasıetti Qurannyń Baqara súresiniń 187-aıatynda: «Olar senderge kıim, sender de olarǵa kıim ispettisińder»degen. Sondaı-aq, Quran Kárim men paıǵambarymyzdyń súnnetinde áıel adamǵa erekshe kóńil bólip, onyń ar-namysyn qorǵap, qoǵamda laıyqty orynǵa ıe bolýyn qamtamasyz etedi», – dedi.
Aıta ketsek, juma namazy sanıtarlyq talaptarǵa saı ótti. Osy rette Qazaqstan musylmandary dinı basqarmasy jamaǵatty meshitke kelgende sanıtarlyq talaptardy qatań saqtaýǵa shaqyrady.
