Bas múftı «Jýsan» operatsııasy arqyly otanǵa oralǵan azamatshalarmen kezdesti (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Atyraýdaǵy «Imanǵalı» meshitinde «Jýsan» operatsııasy arqyly elge oralǵan azamatshalarmen kezdesti.
Basqosýda Bas múftı: «Allaǵa shúkir, memleketimiz sheteldegi qandastarymyzǵa da qamqorlyq tanytyp, soǵys oty órshigen elden ózderińizdi alyp keldi. Árbir adam balasy qashan da jaqsylyqty úmit etetini ras. Pende óziniń úmiti arqyly túrli belesterden qınalmaı ótip, bıik shyńdarǵa shyǵyp, kóptegen jetistikterge qol jetkizedi. Qatelik jasaý – o bastan adam tabıǵatyna tán qubylys. Pende «men qatelik jasadym, endi bolashaǵym bulyńǵyr» dep úmitsizdikke salynbaý kerek. Kerisinshe, keleshegi jaqsy bolatynyna úmit artyp, jaqsylyǵyn kútý qajet. Halqymyz «Adasqannyń aıyby joq, qaıta úırin tapqan soń» deıdi. Sondyqtan sizderdi qoǵamǵa sińisip, elge qyzmet etýge shaqyramyn» dedi.
Kezdesý barysynda áıelder memleket pen QMDB qamqorlyǵyna alǵys bildirdi. Sonymen qatar kókeıdegi saýaldaryn Bas múftıge qoıyp, jaýap aldy.
