Bas múftı «Jýsan» operatsııasymen elge oralǵan qandastardyń úıinde qonaq boldy (FOTO)
Memlekettiń qamqorlyǵymen júzege asqan «Jýsan» gýmanıtarlyq operatsııasy aıasynda Qordaı óńirine 3 áıel jáne 6 bala jetkizilgen bolatyn. Osy óńirge jumys saparymen kelgen Bas múftı Naýryzbaı qajy Taǵanuly Gúlshat Ilııazova men Ilmıra Fahrıevanyń otbasynda boldy. Atalǵan áýlettiń turmysymen tanysyp, nasıhatyn jetkizdi.
«Sizderge jyraqta ońaı bolmaǵanyn bilemiz. Biraq bizdiń memleketimiz óz azamatyn ózekke teppeı, ózge elde jetimniń kúıin keshpesin dep osynda ákeldi. Týǵan jerdiń qadirin, bostandyqtyń qadirin bile bermeımiz. Biraq budan asqan baqyt joq. Táýelsiz otanymyz bar. Dástúrli dinimiz qaıta oraldy. Endigi jerde Sizder ana retinde myna júrgen búldirshenderdiń erteńin oılaýǵa tıissizder. Osy balalardyń alańsyz bilim alyp, eldiń azamaty retinde qalyptasýǵa kúsh jumsańyzdar», - dedi Bas múftı.
Aıta keteıik Qordaı aýdanyna kelgen bul otbasynyń turarǵa baspanasy bolmaǵan. Degenmen jergilikti ımamdar máseleni tez arada sheship, ótken Ramazan aıynda kásipkerlerdiń demeýimen 6 bólmeli úıdi syıǵa beripti. Dinı basqarma atynan osy shańyraq ıelerine úıge qajetti tehnıka tartý etildi. Jýsan operatsııasymen elge oralǵan qos ana óz rızashylyqtaryn bildirip jatty.
