Bas múftıdiń Syr eline sapary bastaldy (FOTO)
Búgin Bas múftı Naýryzbaı qajy Taǵanuly eki kúndik jumys saparymen Qyzylorda oblysyna keldi. QMDB Tóraǵasy aldymen aımaq basshysy Gúlshara Ábdiqalyqovamen kezdesti.
Delegatsııany jyly qabyldaǵan Gúlshara Naýshaqyzy dinaralyq, ultaralyq tatýlyqty saqtaýda Dinı basqarma qyzmetkerleri men ımamdardyń róli joǵary ekenin atap ótti. Sondaı-aq pandemııa kezinde meshit qyzmetkerlerimen birigip kóptegen ıgi ister atqarylǵanyn jetkizdi.
Bas múftı óńir basshysyna Qurban aıt kezinde qoldaý kórsetip, ulyq meıramymyzdyń joǵary dárejede ótýine atsalysqany úshin alǵys aıtty. «Bizdiń maqsatymyz aıqyn. Óńirdegi dinı ahýaldy taldap-tarazylaý, qordalanǵan máselelerdi anyqtap, sheshý jolyn tabý. Prezıdent Qasym-Jomart Toqaevtyń qabyldaýynda bolyp, Ihsan ilimin taratý, Islam akademııasyn ashý jaıly usynystarymdy jetkizdim. Memleket basshysy bul jobany qoldady. Osy baǵyttaǵy jumysty birlesip jandandyrýǵa shaqyramyn» dedi Naýryzbaı qajy Taǵanuly.
Sonymen qatar qaıyrymdylyq jumystaryn birlesip atqarý, asyl dinniń nasıhaty, jat aǵymmen kúres taqyryby sóz boldy. Kezdesý sońynda Gúlshara Naýshaqyzy Dinı basqarmanyń usynystardy qoldaıtynyn jetkizdi.
Aıta keteıik, kezdesýge QMDB Apparat basshysy Ǵylymbek Jádigeruly, Dinı bilim jáne kadr daıarlaý bóliminiń meńgerýshisi Smaıyl Seıtbekov, Aqparat jáne qoǵammen baılanys bóliminiń meńgerýshisi Marat Bektazınov qatysty.
