Bas múftıdiń Jambyl oblysyna jumys sapary bastaldy (FOTO)
Búgin Jambyl oblysyna jumys saparymen kelgen Bas múftı Naýryzbaı qajy Taǵanuly óńir basshysy Berdibek Saparbaevpen kezdesti.
Kezdesýge QMDB Apparat basshysy Ǵylymbek Jádigeruly, Aqparat jáne qoǵammen baılanys bóliminiń meńgerýshisi Marat Bektazın jáne aımaqtyń bas ımamy Beıbit Myrzageldıev qatysty. Aldymen sóz alǵan Berdibek Mashbekuly Bas múftıge alǵysyn bildirdi.
«Tarıhı óńirge qosh keldińizder. Jyl basynda Ózińizben Qordaıda kezdesip, qordalanǵan máselelerdi ortaq sheship kelemiz. Bizge keregi – yntymaq, birlik. Josparyńyzben tanysyp shyqtym. Saparyńyz jemisti bolsyn. Qazirgi kezde halyqqa rýhanı tárbıe berýde ımamdardyń róli joǵary. Endeshe birlesip jumys atqarýda tabysty bolaıyq», – dedi aımaq basshysy.
Óz kezeginde Naýryzbaı qajy Taǵanuly jyly júzdesýge rızashylyǵyn bildirdi.
«Bul ólke – tarıhı, kıeli meken. Sonaý zamandarda qazaq jerindegi Islamnyń taraýyna bul shahardyń mańyzy zor boldy. Ózińiz basqaryp otyrǵan óńirge bereke tileımin. Indetten aıyǵyp, aýrýdan aman bolaıyq. Qazir Dinı basqarma Taraz,Túrkistan sekildi tarıhı mekenderge zııarat uıymdastyrýdy bastap ketti. Múftııattyń «Taýaf» týrfırmasy arqyly alǵashqy lek Túrkistan men Otyrarǵa bardy. Jaqynda ǵana «Zırat pen zııarat ádebi» atty qujat qabyldadyq. Sonyń aıasynda jumystar bastaldy. Qordaıdaǵy jaǵdaı baqylaýda. Imamdarymyz júıeli jumys istep keledi», – dedi Bas múftı ózara kezdesýde.
Sonymen qatar, júzdesýde oblysta salynyp jatqan jańa meshitter men medreselerdiń qazirgi ahýaly sóz boldy.
