Bir ǵasyr burynǵy meshit tabyldy (FOTO)
Batys qazaqstan oblysyndaǵy arheologııalyq qazba jumysy nátıjesinde meshittiń orny anyqtaldy. Bul týraly Batys Qazaqstan tarıh jáne arheologııa ortalyǵynyń dırektory Jantas Safýllın Facebook paraqshasynda jazdy.
«Qabyrǵasy qyzyl kirpishten qalanǵan, qalyńdyǵy 80 sm, syrty aq kirpishpen qaptalǵan, ishi ádemi kómkerilgen meshit bolǵany anyq boldy. Aqmeshittiń medresesinde Ábýbákir (Kerderi) Boranqululy dáris bergen, Jumaǵazy hazyret juma namazyn osynda kelip oqyǵan dep aıtylady. Hamza Esenjanovtyń «Aq jaıyq tóńkeris ústinde» shyǵarmasynda «Jaıyqtyń ishki betindegi ataqty meshittiń biri» dep kórsetken meshit osy ekenine kúmánim joq. Bunda sol óńirdiń ıgi jaqsylary turaqty jıylatyndyǵy jazylǵan. Janynda bala oqytatyn eki medrese bolǵany, balalar aldymen osynda bilim alatyny da aıtylǵan. Shyǵarmada úsh júzdeı úı bar delingen. Arheolog Murat Qalmenov eki júzdeı úıdiń orny baıqalady deıdi. Sonda bul jer aýyl emes, qala dep aıtýǵa keletin úlken ortalyq bolǵan. Úlkenderdiń aıtýy boıynsha bul meshit 1929 jyldary shamasynda qulatylypty» deıdi J.Safýllın.
Sondaı-aq ol endigi jerde osy qazba barysynda ashylǵan meshit ornyn mal tapamaıtyn, jańbyr men qar jaýmaıtyn etip jabyn jasaý kerektigin jazdy.
