Bir jyl kútken sát: Bas múftı juma namazyn júrgizdi (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly kıeli Túrkistan oblysyna resmı saparmen bardy. Sapar barysynda Bas múftı Otyrar aýdany Sháýildir eldimekenindegi «Esen ana» meshitinde juma namazyn júrgizdi. Juma namazǵa QMDB Apparat basshysy Ǵylymbek Jádigeruly, Sharıǵat jáne pátýa bóliminiń meńgerýshisi Sansyzbaı qajy Qurbanuly qatysty.
Jamaǵatqa nasıhat aıtqan Naýryzbaı qajy Taǵanuly: «Allaǵa sansyz shúkirler bolsyn! Búgin bir jylǵa jýyq asyǵa kútken juma namazyn oqýǵa múmkindik aldyq. Qaýipsiz «jasyl aımaqta» ornalasqan meshitterimizde juma namazyn oqýǵa ruqsat berildi. Minekı, sizderdiń duǵalaryńyzdyń arqasynda, ortaq pátýaǵa baǵynǵan birligimizdiń nátıjesinde osyndaı oń sheshimniń qabyldanýyna sebepshi boldyq. Táýbá! Osy kúnge jetkizgen Jaratqanǵa myń táýbá!
Ózderińiz jaqsy bilesizder, búginde barsha álem juqpaly indettiń zardabyn áli kúnge deıin kórip keledi. Árıne, bárimiz juma namazyn saǵyndyq. Alaıda osyndaı jaqsy sezim bir-birimizge qııanat jasaýǵa ákep soqpaýy kerek.
Osy rette sizderdi juma namazy kezinde sanıtarlyq talaptardy qatań saqtaýǵa shaqyramyn. Áýeli ózimizdi, sodan keıin ózgeni juqpaly dertten saqtaıyq. Alla Taǵala tártipke baǵynyp, udaıy juma namazymyzdy oqýdy násip etkeı. Rabbymyz elimizdegi barlyq meshittiń esigin juma namazǵa tolyq ashýdy násip etkeı! Urpaǵymyzdy salıqaly etkeı. Asa raqymdy Haq Taǵala jer betinin juqpaly indetti joıyp, jaqsy kúnderde júzdesýdi jazǵaı. Ámın» dedi.
Aıta ketsek, búgin «Esen ana» meshitine kelgen jamaǵat dene qyzýyn tekseretin qurylǵy arqyly qulshylyq úıine kirdi. Juma namazy sanıtarlyq talaptarǵa sáıkes ótkizildi. Imamdar kúsheıtilgen rejımde qyzmet etti.
