Birinshi kúnniń nátıjesi: Jumys toby 1201 adammen suhbattasty (FOTO)

Bas múftı Naýryzbaı qajy Taǵanuly bastaǵan jumys toby Atyraý oblysynda bir kún ishinde 19 kezdesý ótkizdi. Oǵan 1201 adam qatysty.

Bas múftı Naýryzbaı qajy Taǵanuly munaıly ólkege saparyn Atyraý oblysynyń ákimi Mahambet Dosmuhambetovpen kezdesýden bastady. Kezdesý nátıjesinde taraptar aımaqty sapaly, bilikti dinı kadrlarmen qamtamasyz etýge ýaǵdalasty. Budan soń Bas múftı Atyraý oblysy boıynsha dinı Ekstremızm jáne terrorızm baǵytymen kúresýshi ​ mekeme qyzmetkerlerimen kezdesý ótkizdi.

Odan ári Naýryzbaı qajy Taǵanuly oblys ımamdary úshin bastalǵan 4 kúndik semınardyń ashylý rásimine qatysty. «Jat aǵymnyń aldyn alý jáne onyń ádistemesi» atty semınarda sala mamandaryna radıkaldyq kózqaras ustanýshylaryn dástúrli mázhabqa qaıtarýdyń tyń tásilderi aıtyldy.

Budan keıin Bas múftı Naýryzbaı qajy Taǵanuly tutas oblys meshitteri boıynsha uıymdastyrylǵan «Mektepke jol» aktsııasyna qatysyp, balalarǵa qýanysh syılady.

Delegatsııa quramyndaǵy belgili ustaz, QMDB Sharıǵat jáne pátýa bóliminiń meńgerýshisi Sansyzbaı Shoqanov ortalyq «Imanǵalı» meshitinde jamaǵatpen kezdesý ótkizip, «Islamdaǵy neke jáne talaq máselesi» taqyrybynda, Sultan Beıbarys meshitinde «Allanyń qudirettiligi» taqyrybynda ýaǵyz aıtty.

QMDB Ýaǵyz-nasıhat bóliminiń meńgerýshisi Batyrjan Mansurov «ARES» kolledjinde kezdesý ótkizip, «Islamdaǵy tárbıe máselesi» taqyrybynda ýaǵyz aıtty. Keıin «Quspan molla» Atyraý qalalyq meshitinde jamaǵatqa «Shaıtannyń adam balasyn azǵyrý tásilderi» taqyrybynda nasıhat júrgizdi. Delegatsııa quramyndaǵy Dinı ońaltý bóliminiń meńgerýshisi Qanat Alshynbaev Aqparattyq taldaý ortalyǵy ujymymen júzdesip, dinı ońaltý bóliminiń ádistemesi baǵytynda tájirıbesimen bólisti. Sondaı-aq, Qajymuqan Muńaıtpasov atyndaǵy meshitte «Allaǵa qulshylyqtyń máni» taqyrybynda jamaǵatqa ýaǵyz aıtty.

Jumys tobyndaǵy Hamzat Ádilbekov ortalyq «Imanǵalı» meshiti bazasyndaǵy medıastýdııada «Jat aǵymnyń aldyn alý sharalary» taqyrybynda suhbat berdi. Sonymen qatar ortalyq meshittiń belsendi jastarymen kezdesý ótkizip, «Jastyq shaq jáne ýaqyt qundylyqtary» taqyrybynda dáris oqydy.

Ustaz Rızabek Battaluly ortalyq «Imanǵalı» meshiti bazasyndaǵy medıastýdııada «Adal rızyq» taqyrybynda suhbat berdi. Sonymen birge, át-Taqýa meshitinde «Dindegi kórealmaýshylyq máselesi» taqyrybynda ýaǵyz-nasıhat júrgizdi.

Delegatsııa quramyndaǵy ustaz Ǵazız Ahmetov 157/9 túzetý mekemesinde jazasyn óteýshilermen kezdesip, «Islamnyń birlikke bergen mańyzy men róli» taqyrybynda ýaǵyz aıtty. Sonymen qatar Atyraý selolyq meshitinde jamaǵatpen júzdesip, «Munafıqýn» súresin tápsirledi.

Ustaz Ulan Sharıpov ​ortalyq «Imanǵalı» meshiti bazasyndaǵy medıastýdııada​ «Femınızm, áıel teńdigi jáne dinı kózqaras» taqyrybynda suhbat berdi. Sonymen qatar «Máýlimbergen» meshitinde jamaǵatpen júzdesip, «Múminderdiń sıpattary» taqyrybynda ýaǵyz aıtty.

Belgili ustaz Amantaı Sadıev «Jýsan» operatsııasymen elge oralyp, qazirgi tańda jazasyn ótep jatqan áıelder jamaǵatymen onlaın formatta kezdesý ótkizdi. ÝG-157/11 áıelder túzetý mekemesimen​ «Zýým» qosymshasy arqyly baılanysqa shyqqan kezdesýde «Sýıtsıd jáne qoǵamdy kúpirge shyǵarmaý» taqyrybynda ýaǵyz aıtyldy.