Bıyl pitir mólsheri 420 teńge bolyp belgilendi (FOTO)
Elordada Bas múftı Naýryzbaı qajy Taǵanulynyń tóraǵalyǵymen ótken Qazaqstan musylmandary dinı basqarmasynyń keńeıtilgen Tóralqa májilisinde bıylǵy pitir sadaqasynyń, zeket pen pidııanyń mólsheri anyqtaldy.
Bıyl pitir mólsheri 420 teńge bolyp belgilendi. Pitir sadaqanyń mólsheri 2 keli unnyń ortasha baǵasymen esepteldi. Al unnyń baǵasy QMDB-nyń qala jáne oblys ókildikteriniń bergen málimeti negizinde anyqtaldy.
QMDB Ýaǵyz-nasıhat bóliminiń meńgerýshisi Batyrjan Mansurov Tóralqa májilisinde taraýyq namazynda sanıtarlyq talaptardy saqtaı otyryp qysqa súreler oqý, aýa raıy qolaıly aımaqtarda meshit aýlasynda ótkizý, Ramazan aıynda Quran hatym jasaıtyn toptar quryp, jamaǵatty saýapty isterge jumyldyrý jaǵyna basymdyq berý týraly aıtty. Sondaı-aq Batyrjan Mansurov qasıetti aıda onlaın jáne tikeleı Efırde birneshe joba usynylatynyn jetkizdi.
Tóralqa májilisinde QMDB Aqparat jáne qoǵammen baılanys bóliminiń meńgerýshisi Marat Bektazınov aı boıy «Ramazan – ulyq aı» atymen tikeleı Efır uıymdastyrý, áleýmettik jelilerde ortalyq meshit paraqshalarynda oblysqa tanymal tulǵalarmen «Ramazan – on eki aıdyń sultany» atty kúndelikti onlaın suhbattar ótkizý, «Berekeli Ramazan» degen atpen aptalyq marafon bolatynyn aıtty. «Halyq arna telearnasynan tikeleı Efırde Ramazanǵa qatysty jobalar kórermenge jol tartpaq», – dedi Marat Dálelhanuly.
