Bıyl ramazan aıy 13 sáýirde bastalady (FOTO)
Elordada Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń keńeıtilgen Tóralqa májilisi ótti. Onlaın rejımde ótken májiliske naıb múftı Ershat Aǵybaıuly, QMDB Apparat basshysy Ǵylymbek Jádigeruly, bólim basshylary men bas ımamdar qatysty.
Jıyndy ashqan QMDB Tóraǵasy Naýryzbaı qajy Taǵanuly: «Sanaýly kúnderden soń qasıetti Ramazan aıy kiredi. Musylman úmbeti úshin Ramazan – sondaı bir erekshe aı. Elimizdegi qanshama baýyrlarymyz osy aıdy kútedi, orazasyn ustaıdy. Meıirim men keshirimge, saýapqa toly aıdy ádettegideı óz deńgeıinde ótkizýdi Alla násip etsin! Qazirgi jaǵdaıdy eskere otyryp, eń bastysy tazalyq pen tártip jaǵyna kóńil bólsek. Osy aıda meılinshe qaıyrymdy isterdi kóbirek atqarýǵa shaqyramyn. Jamaǵattyń yńǵaıyna qaraı ýaqytyn belgilep onlaın dárister, Quran úıretý sabaqtaryn ótkizýdi jalǵastyrýymyz kerek. Halyqqa paıdaly ýaǵyz taratý maqsatynda tikeleı Efırler uıymdastyryp, múmkindigi joq jandarǵa aýyzashar paketterin jetkizý jaǵyn qolǵa alýdy tapsyramyn», – dedi.
Keńeıtilgen májilis barysynda 8 másele qaraldy. Tóralqa májilisinde QMDB Sharıǵat jáne pátýa bóliminiń meńgerýshisi Sansyzbaı Qurbanuly Ramazan aıynyń bastalýy, Qadir túni jáne Oraza aıt kúnderi jaıly baıandady. Bıyl Ramazan aıy 13 sáýirde bastalyp, 12 mamyrda aıaqtalady. Ramazan aıy 30 kún bolady. 13 mamyr – Oraza aıt kúni. 8 mamyrdan 9 mamyrǵa qaraǵan tún – Qadir túni.
Bas múftı jıynǵa qatysýshylardyń usynys-tilekterin tyńdap, jaýapty bólim basshylary men ımamdarǵa naqty tapsyrmalar júktedi.
