Bólim basshysy taǵylymdy dáris ótkizdi (FOTO)
QMDB Tóraǵasy, Bas múftı Naýryzbaı qajy Taǵanulynyń bastamasymen Nur-Sultan qalasynda ótken «Islam – mádenıet pen izgilik bastaýy» atty ımamdardyń IV respýblıkalyq onlaın-forýmynda «Zııatker ımam» qujaty qabyldanǵan bolatyn.
Osyǵan oraı QMDB janynan Ádep keńesi qurylyp, Bas múftıdiń tapsyrmasymen osy qujatty nasıhattaý jumysy qolǵa alyndy. Atalǵan qujatty tanystyrý maqsatynda Shyǵys Qazaqstan oblystyq «Halıfa Altaı» meshitinde «Meshit ımamdarynyń qyzmettik ádebi» atty óńirlik semınar ótti.
Basqosýǵa QMDB Dinı bilim jáne kadr daıarlaý bóliminiń meńgerýshisi, Ádep keńesiniń hatshysy Smaıyl Seıtbekov arnaıy qatysyp, Óskemen aımaǵy ımamdaryna qyzmettik ádep haqynda taǵylymdy dáris ótkizdi.
«Asyl dinimizdiń rýhanı qundylyqtaryn qoǵamda nasıhattaý – ımamdarymyzdyń basty mindeti. Din qyzmetkerleri ádiliktiń, adaldyqtyń, parasattylyqtyń úlgisi bolýy tıis. Osy baǵytta Dinı basqarma qabyldaǵan qujattardy nasıhattaý kún tártibindegi basty shara bolyp otyr» dedi Smaıyl Seıtbekov. Sondaı-aq ol óńir ımamdaryna qoǵamdaǵy ımamnyń rýhanı tulǵasyna qoıylatyn talaptardy jeke-jeke taldap túsindirip, ımamdardyń saýaldaryna jaýap berdi.
Semınarda Óskemen aımaǵynyń bas ımamy Ermek Muqataı bul baǵyttaǵy jumystar Bas múftıdiń arnaıy tapsyrmasy aıasynda úzdiksiz atqaryla beretinin atap ótti. «Qazirgi tańda ımamdar men din qyzmetkerleriniń rýhanı tulǵasyn zamanǵa saı beıimdep, qoǵam talabyna saı zııatker tulǵa deńgeıine jetkizý úshin birqatar qujattar qabyldady. Búgingi jıyndy da osy baǵytta ótkizip otyrmyz» dep atap ótti Ermek Muqataı.
