Dinı fýndamentalızmge qarsy turý máseleleri talqylandy (FOTO)
Elordadaǵy QR Ulttyq mýzeıinde Nur-Sultan qalasy ákimdiginiń uıymdastyrýymen «Dinı fýndamentalızmniń dinı-saıası ózekti máseleleri» taqyrybynda semınar ótti.
Semınarǵa QR Aqparat jáne qoǵamdyq damý mınıstrligi Din isteri komıtetiniń tóraǵasy Erjan Núkejanov, QMDB Tóraǵasynyń orynbasary, naıb múftı Ershat Ońǵar, Nur-Sultan qalasy ákimdigi Din isteri basqarmasynyń basshysy Nurdáýlet Álmuhanov jáne elordalyq ımamdar qatysty.
Jıynda naıb múftı Ershat qajy Aǵybaıuly baıandama jasap, ózekti máselege qatysty oı-pikirin bildirdi.
Dinı fýndamentalızm taqyryby elimiz úshin asa ózekti másele. Qazirgi kezde kóp adamdardyń dinge kelip jatqandyǵy kóńil qýantady. Alaıda kóbisi din men shynaıy ómirdi bir-birimen baılanystyra almaı jatady. Dinge kelgen soń barynsha oqshaýlanyp, dinı zańnyń nemese dogmanyń sheńberinde ǵana ómir súrý kerek dep oılaıdy. Qorshaǵan álemdi buzylǵan, kúnáhar dep, ózderin ǵana taza, durys dep sanaıdy. Mundaı kózqaras árıne adamdy radıkaldyqqa ıtermeleıdi. Qoǵamǵa, basqa adamdarǵa degen jekkórinishtilik týdyrady.
Biz zaıyrly elde, zaıyrly qoǵamda ómir súrip jatqandyqtan, basqalarmen sanasýymyz kerek. Eshbir adamdy dinı kózqarasyna baılanysty shektep, qysym kórsetýge, ıakı úkim aıtyp, dinnen shyǵarýǵa bolmaıdy. Bul zańda da, sharıǵatta da anyq jazylǵan»
Sondaı-aq, is-shara barysynda Erjan Núkejanov Din isteri komıteti qyzmetiniń úsh negizgi baǵyty, sonyń ishinde halyq arasyndaǵy aqparattyq-túsindirý jumystary, ınternet-keńistikte dinı Ekstremızm kórinisteriniń aldyn alý, destrýktıvti dinı aǵym (DDA) ustanýshylaryn ońaltý jáne olardy áleýmettik ortaǵa qaıta beıimdeý sharalary týraly aıtyp berdi. Odan bólek komıtet tóraǵasy QMDB meshit ımamdarynyń bilimi men biliktiligin arttyrý, DDA qatarynda júrgen azamattardy ońaltý jáne olardy qaıta beıimdeý, sondaı-aq ınternet keńistikte jumys jasaıtyn dinı qyzmetkerlerdiń zamanaýı kommýnıkatsııalyq daǵdylaryn damytý jóninde birqatar usynystardy jetkizdi.
Is-shara sońynda qatysýshylar din salasyndaǵy memlekettik saıasatty júzege asyrý jóninde ary qaraı yntymaqtastyqqa daıyn ekendikterin bildirdi.
