Efıopııadaǵy sahabalar jerlengen meshitti qalpyna keltiredi
Efıopııa bıligi eldiń Tygraı aımaǵynda ornalasqan Nájashı meshitin qalpyna keltirýge ýáde berip otyr. Aıta keteıik, ótken jyldyń qarasha aıynda Halyqtyq qutqarýshy front (TPLF) pen bılik áskeri arasynda bolǵan qarýly qaqtyǵys kezinde tarıhı meshit aıtarlyqtaı zardap shekken bolatyn. Qazirgi ýaqytta keltirilgen zııandy kózben kórip, shyǵyn mólsherin esepteý maqsatynda arnaıy tehnıkalyq top jumysqa kirisken kórinedi.
Bir kezdegi Efıopııa patshasy Nájashı aty berilgen bul qulshylyq ordasynyń aýmaǵynda Muhammed (s.ǵ.s.) paıǵambarymyzdyń sahabalary jerlengen. Tarıhtan belgili, múshrikter azabynan qorǵalap, birneshe sahaba Paıǵambarymyzdyń (s.ǵ.s.) aıtýymen VII ǵasyrda Efıopııa jerine hıjret jasaǵan bolatyn.
