Elimizde Qurban aıt merekesi bastaldy (FOTO)
Búgin, 20 shilde – Qurban aıttyń birinshi kúni. Sharıǵatqa sáıkes, ulyq meıram aıt namazyn oqýmen bastaldy.
Eldegi pandemııa jaǵdaıyna baılanysty kóptegen óńirlerde, ásirese, Nur-Sultan, Almaty men Shymkent sekildi iri qalalarda aıt namazy oqylmady.
QMDB Tóraǵasy, Bas múftı Naýryzbaı qajy Taǵanuly Aqmola oblysyna qarasty Jibek Joly kentinde (aýyly) aıt namazyn ótkizip, el men jerdiń tynyshtyǵy úshin arnaıy duǵa jasady.
«Qurmetti jamaǵat, Qurban aıt – eńsemizdi tiktep, kóńildi júretin ulyq merekemiz. Bir-birimizdi aıtpen quttyqtap, syı jasaıyq. Áıteýir bul kúnder basqa jáı kúnder sekildi ótip ketpesin. Indetten qaıtys bolǵandardyń sońynan duǵa jasap, aýyryp jatqandardyń tezirek saýyǵyp ketýin jáne osy qıyndyqtan aman-esen qutylýymyzdy Alladan tileıik. Meıram qutty bolsyn!» dedi Bas múftı.
Eske sala keteıik, respýblıkanyń túkpir-túkpirinde qurban shalý rásimderi bastalyp ketti. Pandemııa jaǵdaıyna baılanysty elimizdiń birqatar aımaǵynda qurbandyq shalý biryńǵaı onlaın formatta qurban2021.kz saıty arqyly júzege asyp jatqan bolsa, keı óńirlerde jartylaı dástúrli formatta atqarylýda.
Árıne, Qurban aıt tek namaz oqyp, qurban shalýmen shekteletin mereke emes. Allany ulyqtaýmen birge izgilik, qaıyrymdylyq, jaqyn adamdardyń jarasymy men týǵan-týystyń tatýlyǵy, muqtajǵa kómek, miskinge qoldaý, osynyń barlyǵy bir merekeniń boıyna syıyp turǵandaı.
Alla Taǵala siz ben bizden qabyl etsin! Qurban aıt qutty bolsyn, Qazaq eli!
