Elordada «orazanyń qaıyrymdylyq syılyǵy» aktsııasy ótti (FOTO)
Elordada Birikken Arab Ámirlikteriniń Qazaqstan Respýblıkasyndaǵy Elshiligi qoldaýymen «Orazanyń qaıyrymdylyq syılyǵy» atty aktsııa ótti.
«Elordada qaıyrymdylyq aktsııasy áli de jalǵasyn tabady. Qazaqstan Respýblıkasyndaǵy Arab Ámirlikteriniń Elshiliginiń qoldaýymen, Qazaqstan musylmandary dinı basqarmasy men elorda ákimdigi birlesip búgingi sharany uıymdastyryp jatyr. Basty maqsatymyz – muqtaj jáne áleýmettik az qamtylǵan otbasylarǵa azyq-túlik sebetterin taratý», — dedi Din isteri basqarmasynyń basshysy Nurdáýlet Imanáliuly.
Aktsııa barysynda muqtaj jandarǵa azyq-túlik jáne ystyq as taratyldy. 1300 qoraptyń 200-i elorda turǵyndaryna, qalǵany elimizdiń 9 aýdany men Rıdder qalasyndaǵy órtten japa shekkenderge tabys etiledi.
«Qazaqstan Respýblıkasyndaǵy Birikken Arab Ámirlikteriniń Elshiligi qasıetti Ramazan aıynda tartý-taralǵysyn úlestirip otyr. Birikken Arab Ámirlikteri qaı kezde de kómek qolyn sozýǵa daıyn. Sizderdi Ramazan aıy men kele jatqan Aıt merekesimen shyn júrekten quttyqtaımyn!», – dedi atalǵan Elshiliktiń saıası, Ekonomıkalyq jáne medıa máseleleri jónindegi bóliminiń basshysy Mıra Alazızı.
Óz sózinde «Áziret Sultan» meshitiniń bas ımamy Erbolat Júsipov árbir musylman úshin Ramazan aıynyń orny erekshe ekenin málim etti.
«Árbir musylman úshin 12 aıdyń sultany – Ramazan mańyzdy oqıǵalardyń biri. Qaıyrymdylyq aktsııasyna atsalysqan jandarǵa alǵysymdy bildiremin. Eki eldiń arasyndaǵy dostyq nyǵaıa bersin», — dedi «Áziret Sultan» meshitiniń bas ımamy Erbolat Júsipov.
