Elordadaǵy «Sádýaqas qajy Ǵylmanı» meshitine bas ımam taǵaıyndaldy (FOTO)
Búgin el astanasy Nur-Sultan qalasyndaǵy «Sádýaqas qajy Ǵylmanı» meshitine bas ımam taǵaıyndaldy. QMDB Tóraǵasy, Bas múftı Naýryzbaı qajy Taǵanulynyń buıryǵymen «Sádýaqas qajy Ǵylmanı» meshitiniń bas ımamy bolyp QMDB Ýaǵyz-nasıhat bóliminiń mamany Hamzat Ádilbekov taǵaıyndaldy. Bul týraly meshit ujymyna arnaıy jınalys ótkizý barysynda Nur-Sultan qalasynyń bas ımamy Erbolat Júsipov málim etti.
Bas múftıdiń buıryǵyn oqyp bergen Erbolat Júsipov Hamzat ımamdy jańa qyzmetimen quttyqtaı otyryp, aldaǵy jumystaryna sáttilik tiledi. Jańa jaýapty qyzmetke aýysyp bara jatqan Baýyrjan Esmahanǵa jamaǵattyń atynan rahmet aıtyp, alǵys bildirdi.
Al, buǵan deıingi bas ımam qyzmetin atqarǵan Baýyrjan Esmahan Almaty qalasyndaǵy «Arafat» meshitiniń bas ımamy, meshit janyndaǵy «Arafat» qaıyrymdylyq mekemesiniń dırektory qyzmetine aýysty.
Hamzat Ádilbekov 1984 jyly 27-qańtarda SQO, Aıyrtaý aýdany, Sholaq-Ózek aýylynda dúnıege kelgen. 2001 jyly SQO, Aıyrtaý aýdany, Karasevka aýylyndaǵy orta mektepti támamdaǵan.
2001 – 2004 jyldary Almaty qalasyndaǵy «Nur-Múbárak» ýnıversıtetinde «Islamtanýshy jáne ımam hatıb» mamandyǵy boıynsha bilim alǵan.
2004 – 2008 jyldary Lıvııa memleketiniń Trıpolı qalasynda ornalasqan «Islamǵa Shaqyrý» Ýnıversıtetin «Arab tili jáne ıslamtanýshy» mamandyǵy boıynsha támamdaǵan.
2008-2009 jyldary Lıvııa memleketiniń Trıpolı qalasynda ornalasqan «Islamǵa Shaqyrý» Ýnıversıtetiniń magıstratýrasynyń daıyndyq kezeńin oqyp bitirgen.
2015-2017 jyldary Shymkent qalasynda ornalasqan Aımaqtyq-áleýmettik ınnovatsııalyq ýnıversıtetinde pedogogıka mamandyǵy boıynsha magıstratýra aıaqtaǵan.
2009-2011jyldary Qazaqstan Respýblıkasynyń Lıbııadaǵy Dıpmıssııasynda kezekshi komendent-aýdarmashy qyzmetin atqardy.
2012 jyldyń qańtar aıynan bastap SQO, Petropavl qalasyndaǵy «Qyzyljar» ortalyq meshitinde ustazdyq jáne www.sko-kmdb.kz meshit saıtynyń admınıstratory qyzmetin atqardy.
2017 jyldyń qarasha aıynda QMDB «Nasıhat jáne qoǵammen baılanys» bóliminiń mamany qyzmetine taǵaıyndalǵan.
Úılengen, úsh balasy bar.
