Ǵasyrlyq tarıhy bar kóne meshit qaıta ashyldy (FOTO)
Taraz shaharynda bir ǵasyrdan astam tarıhy bar 1907 jyly salynǵan «Áýlıe ata» meshiti kúrdeli jóndeýden keıin jamaǵatqa esigin qaıta ashty. Kóneniń kózi bolǵan meshittiń ashylý saltanatyna QMDB Tóraǵasy, Bas múftı Naýryzbaı qajy Taǵanuly arnaıy qatysty.
«Bir ǵasyrlyq tarıhy bar «Áýlıe ata» meshitin kúrdeli jóndeýden ótkizip qaıta ashyp jatyrmyz. Bul – óte kóne, tarıhı meshit. Byltyr qazan aıynda kelip, qurylys jumystarymen tanysqan edim. Allaǵa shúkir, mine jamaǵatqa esigin qaıta ashty. Men dál osy meshitten ilim izdep, shetke attanǵan edim. Sol sebepti men úshin de mańyzy zor. Alla Taǵala ǵasyrlyq tarıhy bar meshittiń jamaǵatyna jaqsylyq, kórkem minez ben bereke bergeı. Osynaý qulshylyq úıin jamaǵatpen bezendirip, Alla úıin salǵandarǵa jánnattan záýlim saraı berýin násip etsin! Osy kóne shahardyń jamaǵatyna bul qulshylyq úıi berekeli bolsyn degim keledi. Qutty bolsyn!» dedi el musylmandarynyń tóraǵasy.
Bas múftıdiń quttyqtaý sózinen keıin qulshylyq úıine qoldaý kórsetip, qurylysyna aralasqan ustalarǵa QMDB Tóraǵasynyń alǵys haty tabystaldy. Naýryzbaı qajy Taǵanuly jańarǵan meshitke bas suǵyp, tolyq aralap shyqty.
Qurylys jumystarynyń demeýshisi Aıdar Sultanulynyń aıtýynsha, meshit syıymdylyǵy – 1000 adam. Alla úıi sol burynǵy baǵanalary men aǵashtaryn tolyq saqtap qalǵan. Onyń ishindegi sýretter men oıylǵan oıýlar eshqandaı tehnıkanyń kómeginsiz qolmen jasalypty. Tipti minber mańyndaǵy aıattarǵa deıin qolmen toqylǵan. Jóndeý barysynda ǵımaratqa jylytý edeni, kúmbez qosylǵan. Óıtkeni eski meshittiń buryn kúmbezi bolmaǵan.
Tarıhı meshittiń qaıta ashylýyna QMDB Apparat basshysy Ǵylymbek Jádigeruly, Dinı bilim jáne kadr daıyndaý bóliminiń meńgerýshisi Smaıyl Seıtbekov, Ýaǵyz-nasıhat bóliminiń meńgerýshisi Batyrjan Mansurov, Aqparat jáne qoǵammmen baılanys bóliminiń meńgerýshisi Marat Dálelhanuly, Jambyl oblysynyń bas ımamy Beıbit Myrzageldıev jáne qala ımamdary qatysty.
