Ǵulamalar keńesinde «Ǵıbadat tutqasy» kitabynyń tusaýkeser rásimi ótti (FOTO)
Óskemen qalasynda ótip jatqan Ǵulamalar keńesinde «Ǵıbadat tutqasy» kitabynyń tusaýkeser rásimi ótti.
Keńeste QMDB Baspa jáne aýdarma bóliminiń meńgerýshisi, «Mýftııat» baspasynyń dırektory Murat Manapuly ǵalymdardy kitap mazmunymen tanystyryp, eńbektiń ereksheligi jaıly baıandap berdi.
Tusaýkeser rásimine qatysqan Bas múftı Naýryzbaı qajy Taǵanuly:
«Allaǵa shúkir, Qazaqstan musylmandary dinı basqarmasynyń aǵartý salasyndaǵy jumysy jandanyp keledi. Biz Dinı basqarma janynan Baspa jáne aýdarma bólimin ashyp, halyqqa paıdaly eńbekterdi shyǵara bastadyq. Alla jazsa, osy jyly 14 kitap jaryq kóredi. Jastarymyz Quran aıattaryn durys túsinsin degen nıetpen «Tápsirlerdiń tańdaýlysy» kitabyn shyǵardyq. Bul eńbek qarapaıym ári túsinikti tilmen jazyldy.Sonymen qatar, «Ǵıbadat tutqasy» kitabyn aýdaryp, halyqqa usynyp otyrmyz. Osy rette «Mýftııat» baspasynyń qyzmetkerlerine aıryqsha alǵysymdy jetkizemin. Bul kitaptar jalpy oqyrman qaýymǵa paıdaly bolady degen senimdemin» dedi.
Bul eńbekten ımam ál-Qýdýrıdiń (Alla ony raqymyna bólesin) «Mýhtasar ál-Qýdýrı» kitabyndaǵy «Ǵıbadat» bólimderine qatysty maǵlumattar alasyz. Bul eńbek Hanafı mázhabynyń negizi sanalatyn alǵash jazylǵan klassıkalyq kitaptar qataryna jatady.
Kitapty qurastyrǵan – Danııar Kenjeuly. Eńbekte arab tilindegi derek-materıaldar keltirilgen. Sonymen qatar fıqh salasyndaǵy irgeli eńbekter negizge alynǵan. Bul eńbek din qyzmetkerleri men shákirtter, jalpy oqyrman qaýym úshin qundy qural bolmaq.
