Ǵulamalar keńesiniń HHIH májilisi bastaldy (FOTO)
Búgin Atyraý qalasynda Bas múftı Naýryzbaı qajy Taǵanulynyń tóraǵalyǵymen Ǵulamalar keńesiniń kezekti HHIH májilisi bastaldy.
Keńes jumysyn ashqan Bas múftı Naýryzbaı qajy Taǵanuly: «Ǵulamalar keńesi sharıǵatymyzdyń negizderine súıene otyryp, qoǵamda musylman qaýymy arasynda týyndap otyrǵan kókeıkesti, túıtkildi máselelerdi talqylap, der kezinde sheshimder shyǵaryp, pátýalar men kontseptýaldy qujattar qabyldaıdy.
Biz ótken jyly 14 pátýa, 4 qujat, 4 ereje, al onlaın rejımde 11 málimdeme, 7 úndeý, 2 pátýa qabyldadyq. Pandemııa kezinde álemniń din kóshbasshylaryn bir mezette duǵa jasaýǵa úndedik. Karantın jaǵdaıynda namaz oqý, jerleý rásimderine qatysty pátýa shyǵardyq. Allaǵa shúkir, jamaǵat pátýalarymyzǵa moıynsunyp, úndeýimizge ún qosty. Munyń bári Ǵulamalar keńesiniń belsendi jumysynyń nátıjesinde júzege asty. Ǵulamalarymyzǵa taǵy da aıryqsha alǵys aıtamyn» dedi.
Aıta ketsek, Ǵulamalar keńesiniń HHIH májilisiniń kún tártibinde 4 kontseptýaldy qujat pen 5 pátýa talqylanbaq. Atap aıtqanda, «Úzdiksiz bilim berý» tujyrymdamasy, «Musylmannyń ǵalamtordaǵy kelbeti», «Islamdaǵy jastardyń tulǵalyq beınesi», «Zeket jınaý mádenıeti» syndy qujattar men «Ekpe egý úkimi», «Tólem kartalaryn qoldaný úkimi», «Saqtandyrý qyzmeti úkimi», «Balany qamqorlyqqa alý úkimi» sekildi pátýalardyń jobasy qaralyp, qabyldanbaq.
Keńes jumysy erteń de jalǵasady.
