Ǵulamalar keńesiniń HHVIII májilisi ótti (FOTO)
Búgin Qazaqstan musylmandary dinı basqarmasynyń Almatydaǵy ǵımaratynda QMDB Ǵulamalar keńesiniń HHVIII májilisi ótti.
Májiliske Bas múftı Naýryzbaı qajy Taǵanuly, naıb múftı Ershat Ońǵarov, Apparat basshysy Ǵylymbek Jádigeruly, Sharıǵat jáne pátýa bóliminiń meńgerýshisi Sansyzbaı Qurbanuly, Ýaǵyz-nasıhat bóliminiń meńgerýshisi Batyrjan Mansurov jáne Ǵulamalar keńesiniń birqatar músheleri qatysty.
QMDB Tóraǵasy Naýryzbaı qajy Taǵanuly aldymen basqosýǵa qatysýshylardy Táýelsizdik merekesimen quttyqtap, Ǵulamalar keńesi sharıǵatymyzdyń negizderine súıene otyryp, qoǵamdaǵy musylman qaýymy arasynda týyndap otyrǵan kókeıkesti, túıtkildi máselelerdi talqylap, der kezinde sheshimder shyǵaryp, pátýalar men kontseptýaldy qujattar qabyldap kele jatqanyna toqtaldy.
«Allaǵa shúkir, az ǵana ýaqyttyń ishinde Ǵulamalar keńesiniń kóptegen májilisi ártúrli aımaqta ótti. 2020 jyly Ǵulamalar keńesiniń 4 otyrysy jáne onlaın túrde 4 jınalysy ótti. Jyldyń alǵashqy otyrysy Pavlodar qalasynan bastaý aldy. Ol jerde birneshe pátýa qabyldandy. Kelesi Ǵulamalar keńesiniń májilisi Nur-Sultan qalasynda ótti. Jyldyń úshinshi kezekten tys otyrysy Almaty qalasynda ótti. Ol kezde 4 pátýa talqylandy», - dep atap ótti.
Elimizdegi karantın jaǵdaıyna baılanysty dinı amaldar oryndaýyna qatysty kóptegen suraqtar týyndady. Osy suraqtarǵa sharıǵı turǵydan durys jaýaptar berý maqsatynda Ǵulamalar keńesiniń birneshe onlaın májilisi ótken bolatyn. Onlaın jınalystar nátıjesinde 11 málimdeme, 7 úndeý, 2 pátýa el nazaryna usynyldy. Jalpy bıyl 14 pátýa, 4 qujat, 4 ereje, 11 málimdeme, 7 úndeý qabyldandy.
Jıyn sońynda Naýryzbaı qajy Taǵanuly «Nur-Múbárak» ýnıversıtetiniń prorektory Qaırat Qurmanbaevqa, osy ýnıversıtettiń oqytýshylary, belgili dintanýshy ǵalymdar Shamshádın Kerim, Alaý Ádilbaev, Muhıddın Isauly, Muhan Isahan, Baýyrjan Álıulyna jáne «Tóle bı» meshitiniń bas ımamy Ersin Ámire men «Iman» jýrnalynyń bas redaktory Ońǵar Ómirbekke QMDB-nyń 30 jyldyq tósbelgisin tabystady.
