Imamdardyń IV respýblıkalyq onlaın-forýmy ótedi (FOTO)
Qazaqstan musylmandary dinı basqarmasynyń qurylǵanyna 30 jyl tolýyna oraı 10 jeltoqsan kúni ımamdardyń IV respýblıkalyq onlaın-forýmy ótedi.
Osyǵan oraı QMDB tóraǵasy, Bas múftı Naýryzbaı qajy Taǵanuly arnaıy jıyn ótkizip, forýmnyń daıyndyq jumystary pysyqtaldy.
«Negizgi maqsatymyz – musylman qaýymynyń dinı-mádenı muralaryn odan ári damytý, birlik pen yntymaqty arttyrý, dinı rásimder men as berý, zııarat etý mádenıetin qalyptastyrý men ımamdardyń tulǵalyq bedelin arttyrý. Sondyqtan aldaǵy forýmda «As berý mádenıeti», «Zırat jáne zııarat mádenıeti», «Zııatker ımam» qujattaryn qabyldaý kózdelip otyr» dep atap ótti Bas múftı.
Onlaın-forýmda atalǵan qujattardy qabyldaýdaǵy maqsat – elimizdegi qudaıy as berý mádenıetin qalyptastyrý, halyqty ysyrapqa jol bermeýge úndeý, as berý sharasyn bir úlgimen ótkizý, zıratty zııarat etý rásimi kezinde din talaptaryn eskerý, t.b. Al «Zııatker ımam» qujaty ımamdardy jan-jaqty bilimdi bolýǵa, sharıǵat ilimderimen qosa zaıyrly bilimdi ıgerýge, qoǵamnyń suranysyna saı áleýmettik jelide belsendi bolýǵa, pikirtalas kezinde ádep saqtaýǵa, ultaralyq, dinaralyq birlikti arttyrýǵa, jalpy aıtqanda HHI ǵasyrǵa saı ımam bolýǵa úndeıdi deıdi forýmdy uıymdastyrýshylar.
