Iri qalalar men úlken jol boıyndaǵy meshitter Elektrondy kartaǵa engiziledi (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen bólim saǵatynyń kezekti májilisi ótti. Bólim saǵatynda QMDB Meshit isteri bóliminiń meńgerýshisi Marat Jappasbaev esep berdi.
Marat Abdýllauly búginde elimiz boıynsha meshit sany 2716-ǵa jetkenin atap ótti.
«Ótken jyly múftııattyń 30 jyldyq mereıtoıy aıasynda shalǵaı aýylda ornalasqan 30 meshitke kúrdeli jóndeý jumystary júrgizildi. Qarjylyq ashyqtyqty qamtamasyz etý maqsatynda iri qalalardaǵy meshitke 97 sadaqa qabyldaý termınaly ornatyldy. Jyl sońyna deıin taǵy 97 sadaqa termınaly ornatylmaq. Qulshylyq úılerine qatysty málimetterdiń Elektrondyq bazasy jasalýda. Budan basqa osy jyly iri qalalar men úlken jol boıynda ornalasqan meshitter Elektrondy kartaǵa engiziledi. Búginde Bas múftı bastamasyna oraı meshitterdi qazaqy stılde salý jumystaryna qatysty naqty jobalar júzege asýda» dedi QMDB Meshit isteri bóliminiń meńgerýshisi Marat Jappasbaev.
Bas múftı jol boıyndaǵy meshitterge kóńil bólip, jolaýshy azamattarǵa qolaıly jaǵdaı jasaý máselesine basa nazar aýdarýdy tapsyrdy.
Aıta ketsek, QMDB Tóraǵasy Naýryzbaı qajy Taǵanuly Memleket basshysy Qasym-Jomart Kemelulynyń resmı qabyldaýynda budan bylaı elimizdegi meshitter qazaqy stılde salynatynyn málimdegen bolatyn. Osy ıgi bastamaǵa oraı QMDB janynan arnaıy jumys toby quryldy.
