IV Respýblıkalyq ımamdar forýmynyń úndeýi qabyldandy (FOTO)
Elordada ótken Qazaqstan musylmandary dinı basqarmasynyń 30 jyldyq mereıtoıyna arnalǵan «Islam – mádenıet pen izgiliktiń bastaýy» atty ımamdardyń IV respýblıkalyq onlaın-forýmy qorytyndysy boıynsha arnaıy úndeý qabyldandy. Úndeýdi QMDB Apparat basshysy Ǵylymbek Majıev tanystyrdy.
«Biz, din qyzmetkerleri, zııaly qaýym ókilderi, «Islam – mádenıet pen izgiliktiń bastaýy» atty ımamdardyń IV respýblıkalyq onlaın-forýmynyń qatysýshylary barsha qaýymdy «As berý mádenıeti», «Zırat jáne zııarat mádenıeti» qujattarynda kórsetilgen talap-ótinishterdi oryndaýda yjdahattylyq tanytýǵa úndeımiz. Atalǵan qujattar elimizdegi qudaıy as berý mádenıetin qalyptastyrýdy, ysyrapqa jol bermeýdi, zıratty zııarat etý rásimi kezinde din talaptaryn eskerýdi kózdeıdi.
Osy rette otandastarymyzǵa sadaqa, qudaıy as ótkizý kezinde artyq ysyrapqa jol berilmese degen usynys-tilek bildiremiz. Sonymen qatar zırat basyna záýlim eskertkishter, sándi qorshaýlar, músin keýdeler turǵyzbaýǵa úndeımiz. Qymbat qulpytastar men úlken eskertkishterge ketetin qarajatty jetim-jesirge kómektesý, aǵaıyn-týysqa qaraılasý, bilim ordalaryn turǵyzý, paıdaly kitaptar men oqýlyqtar shyǵarý, jol, kópir salý syndy saýaby mol isterge jumsaýǵa shaqyramyz. Sharıǵat zańdary mindetti túrde qudaıy as ótkizýdi, zırattardy sándeýdi, záýlim eskertkishter ornatýdy talap etpeıtinin jetkizemiz» delingen úndeý mátininde.
