Keıbir meshitterde juma namazyn oqýǵa ruqsat berilýi múmkin (FOTO)
QMDB Tóraǵasy, Bas múftıi Naýryzbaı qajy Taǵanuly elordada Densaýlyq saqtaý vıtse-mınıstri – Bas memlekettik sanıtarlyq dáriger Erlan Qııasovpen kezdesti.
Bas múftı júzdesýde koronavırýs ınfektsııasynyń taralýy boıynsha qaýipsiz «jasyl aımaqta» ornalasqan óńirlerdegi meshitterde juma namazyn oqýǵa ruqsat berý týraly usynysyn jetkizdi.
«Koronavırýs ınfektsııasynyń taralýy boıynsha «jasyl aımaqta» ornalasqan aýyldardaǵy shaǵyn meshitterde profılaktıkalyq jáne Epıdemııaǵa qarsy sharalar qatań saqtalyp keledi. Osyǵan oraı atalǵan meshitterde sanıtarlyq talaptardy saqtaı otyryp juma namazyn ótkizilse. Eger ol aımaqtaǵy Epıdemıologııalyq jaǵdaı nasharlasa, juma namazy toqtatylady» dep atap ótti Naýryzbaı qajy Taǵanuly.
Bas memlekettik sanıtar óz kezeginde qazirgi tańda «qyzyl aımaqta» jeti óńir turǵanyn, koronavırýs ınfektsııasy asqynǵan jaǵdaıda jurt juma namazyn meshitte oqysa, adam kóp jınalyp, áleýmettik araqashyqtyq saqtaý tártibi buzylatynyn, saldarynan elimizde naýqastar sany ósýi múmkin ekenin aıtty.
Qazirgi ýaqytta bul másele Qazaqstan aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııada qaralýda. Komıssııanyń naqty nátıjesi boıynsha tıisti sheshim qabyldanady.
