H respýblıkalyq qarılar baıqaýynyń jeńimpazy avtokólik jeńip aldy (FOTO+VIDEO)

Túrkistan qalasyndaǵy «Kongress Holl» mádenıet kesheninde Qazaqstan musylmandary dinı basqarmasynyń uıymdastyrýymen Quran Kárimdi jatqa jáne mánerlep oqýdan H respýblıkalyq baıqaýy máresine jetti.

74 úmitker baq synaǵan baıqaýdyń jeńimpazdary men júldegerlerin marapattaý rásimine QMDB tóraǵasy, Bas múftı Naýryzbaı qajy Taǵanuly, Túrkistan oblysynyń qurmetti azamattary men el aǵalary, sondaı-aq, din janashyry, jarysqa demeýshilik jasaǵan Baharıdın Ablıazımov arnaıy qatysty.

«Allaǵa sansyz shúkirler bolsyn, jasynan Quran jattaǵan qarılardyń baıqaýyn qorytyndylap, marapattap otyrmyz. Osy baıqaýdy ótkizýge atsalysqan QMDB ujymy men Túrkistan oblystyq ókildigine, qarılardy bastap kelgen oblystardyń bas ımamdary men barsha din qyzmetkerlerine, sonymen qatar demeýshi bolǵan Bahardın Nuǵmanulyna alǵysymdy bildiremin.

Qatysýshylardyń qarym-qabiletin baǵalap, jarysqa tórelik etken qazylar alqasyndaǵy Kámiljan, Sádýaqas, Danııar, Ersin jáne Jumanazar qarılarǵa da raqmetimdi aıtyp, Alla jar bolsyn demekpin. Osy otyrǵan jap-jas qarılarymyz ózderińiz sekildi bilimdi, abyroıly azamat bolyp óssin!» dedi Bas múftı marapattaý sátinde.

Bıyl el Táýelsizdiginiń 30 jyldyǵyna oraı ótken qarılar baıqaýynyń júlde qory burynǵydan da qomaqty boldy. Máselen bas júlde ıegerine jol talǵamaıtyn sheteldik kólik berilse, 30 para boıynsha fınaldyq kezeńge joldama alǵan 5 qarıdyń ekeýine yntalandyrý syılyǵy retinde umra qajylyǵyna joldama berildi. Sondaı-aq 20 para boıynsha tartysty ótken baıqaýdyń da tórtinshi jáne besinshi oryn ıegerlerine qazylar alqasynyń sheshimimen yntalandyrý syılyǵy tabystaldy.

Qazylar alqasynyń sheshimimen 4 atalym boıynsha jeńis tuǵyrynan kóringen qarılardyń tizimi tómendegideı:

«Mánerlep oqý» boıynsha:

I oryn ( 1 000 000 teńge) – Qýanysh Seıtqanov (Almaty qalasy, 29 jasta)

II oryn (700 000 teńge) – Erbolat Shaýdyrbaı (Nur-Sultan qalasy, 24 jasta)

III oryn (500 000 teńge) – Ánýar Syrymuly (Almaty aımaǵy, 20 jasta)     

 

«10 para» boıynsha:       

I oryn (1 500 000 teńge) – Gıesjon Abdıkadırov (Pavlodar oblysy, 22 jasta)     

II oryn (1 000 000 teńge) – Ádilet Saıajanov (Qaraǵandy, 27 jasta)

III oryn (750 000 teńge) – Ábilhaıyr Juban (17 jasta)

 

«20 para» boıynsha:

I oryn (2 000 000 teńge) – Nurtileý Seıtqasym (Qaraǵandy, 9 jasta)

II oryn (1 500 000 teńge) – Habıbolla Raýshan (Aqtóbe, 19 jasta)

III oryn (1 000 000 teńge) – Islamnury Igilik (Túrkistan, 14 jasta)

IV oryn (700 000 teńge, yntalandyrý syılyǵy) – Abdýlbaqı Abdılazız (Almaty qalasy, 9 jasta)

V oryn (500 000 teńge, yntalandyrý syılyǵy) – Ýmaır Abdýsattar (Jambyl oblysy, 13 jasta)

 

«30 para» boıynsha:

Bas júlde (avtokólik) – Álibek Jalıev (Shymkent, 18 jasta)

II oryn (3 000 000 teńge) – Mansýrhan Sarvarhanuly (Almaty qalasy, 11 jasta)

III oryn (2 000 000 teńge) – Nıǵmatýlloh Abdazımov (Túrkistan, 14 jasta).

IV oryn (kishi qajylyq) – Abýalı Qalpashov (Aqmola oblysy, 18 jasta)

V oryn (kishi qajylyq) – Bekzat Tasbolatov (Aqtóbe, 18 jasta)

Jeńimpazdarmen birge baıqaýǵa qazylyq jasaǵan elimizge belgili qarılar Sádýaqas Oljabaı (tóraǵa), Kámiljan Iýldashuly, Danııar Jumabaı, Ersin Ámire men Jumanazar Sadyrhanovqa Bas múftı arnaıy alǵys bildirip, marapattady.

Eske sala keteıik, eki kúnge sozylǵan qarılar baıqaýy el Táýelsizdiginiń 30 jyldyǵyna oraı uıymdastyryldy. Pandemııaǵa baılanysty baıqaý eki kún boıy «Munara TV» telearnasynan tikeleı Efırde, «Mýftııat QMDB» YouTube-arnasynan jáne Múftııattyń Instagram-daǵy @muftiyatkz paraqshasynan onlaın kórsetildi.