H respýblıkalyq qarılar baıqaýynyń jerebesi tartyldy (FOTO+VIDEO)
Búgin kıeli Túrkistan qalasyndaǵy «Qoja Ahmet Iasaýı» meshitinde H respýblıkalyq «Quran Kárimdi jatqa jáne mánerlep oqý» baıqaýynyń jerebe tartý rásimi ótti.
Aldymen baıqaýǵa qatysýshy qarılarǵa sáttilik tilep, duǵa jasaldy.
Jerebe tartý rásimine QMDB Ýaǵyz-nasıhat bóliminiń meńgerýshisi Batyrjan Mansurov, Qajylyq bóliminiń meńgerýshisi Jándillá Bekjigit pen «Muftyat» baspasynyń dırektory Murat Manapuly, sondaı-aq baıqaýǵa tórelik etetin tanymal qarılar Danııar Jumabaev, Ersin Ámire jáne Jumanazar Sadyrhanov qatysty.
Eki kúnge jalǵasatyn baıqaýǵa elimizdiń túkpir-túkpirinen 74 úmitker qatysqaly otyr. Aımaqtyq irikteý kezeńderinen oq boıy oza shapqan saıyskerler 4 atalym, ıaǵnı, Quran Kárimniń 10, 20 jáne 30 parasyn jatqa oqý, sondaı-aq, mánerlep oqý boıynsha baq synamaq. Al búgingi rásim barysynda úmitkerlerdiń rettik nómiri belgili boldy. Qarılar baıqaýy Túrkistan qalasynyń «Kongress Holl» mádenıet kesheninde elimizdegi pandemııaǵa baılanysty saqtyq sharalaryn saqtaı otyryp ótedi jáne jalpy jurtshylyqqa Dinı basqarmanyń «Munara TV» telearnasy men «Mýftııat QMDB» YouTube-arnasynan, sonymen birge @muftiyatkz ınstaparaqshasynan tikeleı kórsetilim usynylady.
Jerebe tartý rásiminde úmitkerlerge jarys uıymdastyrýshylary pandemııaǵa baılanysty baıqaýdyń qalaı ótetinin baıandap, saqtyq sharalaryn eskerýdi surady.
