Halqymyz ǵumyrly, táýelsizdigimiz tuǵyrly bolǵaı!
Qadirmendi qaýym!
Barshańyzdy Alla Taǵalanyń halqymyzǵa bergen teńdessiz syıy – Táýelsizdik kúni merekesimen shyn júrekten quttyqtaımyn. Mereıli merekemiz qutty bolsyn! Otbasylaryńyzǵa baq pen bereke, birlik pen tatýlyq tileımin. Jaratýshy Iemiz denińizge qýat, ár kúnińizge shýaq násip etkeı.
Halqymyzda «Egemendi el kórikti, betegeli bel kórikti» degen naqyl sóz bar. Allaǵa shúkir, táýelsizdigimizdiń arqasynda meshitterimiz ashylyp, medreselerimiz boı kóterdi. Qurban aıt qurmetine demalys jarııalanyp, qulshylyq jasaýǵa erkindik aldyq. «Táýbeniń zory – táýelsizdik» degen tálimdi sózdiń taǵylymy osynda jatsa kerek.
Ata-babamyz «Otan úshin kúres – erge tıgen úles» degen. Qudaıdyń Qazaq eline bergen uly nyǵmeti – táýelsizdigimizdi baıandy ete túsý – túrli salaǵa jaýapty tulǵanyń, ár azamattyń asyl boryshy, myzǵymas mindeti.
Bir úıdiń balasyndaı birligimizdi tanytyp, qoǵam ıgiligi úshin birge qyzmet etip, halyqtyń alǵysyna bólengenimiz abzal. Alla Taǵala elimizdiń órkendeýi men jerimizdiń kórkeıýi jolynda aýyzbirshilik tanytýda barshamyzǵa tabandylyq pen turaqtylyq násip etkeı. Halqymyz ǵumyrly, táýelsizdigimiz tuǵyrly bolǵaı. Ámın!
Naýryzbaı qajy TAǴANULY
Qazaqstan musylmandary dinı basqarmasynyń tóraǵasy, Bas múftı
