Kókshetaýda ardager ımamǵa baspana berildi (FOTO)
Aqmola óńirinde shırek ǵasyrdan beri ımamdyq qyzmet atqaryp kele jatqan Nurlan Ábenulynyń otbasyna oılamaǵan jerden Kókshetaý qalasynyń qaq tórinen osy zamanǵy sáýletpen salynǵan kóp qabatty úıden páter syıǵa berildi.
Saltanatty rásimge jınalǵan kópshilik ımamnyń qýanyshyna ortaqtasty. Tosynsyıdan beıhabar N.Ábenulynyń ózin de, otbasyn da qýantqan ıgi sharada Aqmola oblysynyń bas ımamy Qýanysh Sábıt baspananyń «El úlesi – páterge!» jobasy aıasynda óńir boıynsha berilip otyrǵan on besinshi páter ekenin aıryqsha atady. Uzaq jyldar taban aýdarmaı Kókshetaý qalasyndaǵy meshitterde ımamdyq qyzmet atqaryp kele jatqan Nurlan ımamǵa da jaqsy lebizderin bildirdi. Búginde respýblıkalyq jobaǵa aınalǵan bul bastamanyń alǵash Kókshetaýda bastalǵanyn, osyǵan Qýanysh Sábıttiń muryndyq bolǵanyn aıtqan «El birligi» qoǵamdyq birlestiginiń tóraǵasy Baqyt Smaǵul da izgi tilegin joldady.
Imamǵa úı syılap, qaıyrymdy iske demeýshi bolǵan metsenat Ersaıyn Ǵabdýllınge din qyzmetkerleri rızashylyǵyn jetkizdi. Udaıy qaıyrymdylyq jasaýǵa jaqyn turatyn bul azamat osy joly da atymtaı jomarttyq tanytty.
Ózderiniń tilekterin bildirgen azamattar da asyl dinimizdegi baýyrmaldyqtyń taǵylymyn tilge tıek etip jatty. Eń bastysy, kópbalaly din qyzmetkerine jasalǵan qamqorlyq dinimizdiń altyn arqaý taǵylym eter joly ispettes. Saltanatty páter syılaý rásiminen keıin jınalǵan qaýym Nurlan Ábenulynyń jańa qonysynda jaıylǵan dastarhannan dám tatty.
