«KÓKTAL» MEShITINIŃ UJYMY QARTTAR ÚIINE ZIIaRAT JASADY

«Kóktal» meshitiniń ujymy qarııalardyń qal-jaǵdaıyn suraý maqsatynda qarttar úıine at basyn burdy.

Meshittiń naıb ımamy Hursan Berdimýratov pen Muhtar Halyq kezdesý aıasynda ata-ájelermen jyly qarym-qatynas ornatyp, súbeli suhbat qurdy. Zııarat barysynda ujym qarııalarmen júzdesip, áńgimelesip, olardyń jaǵdaıynan habar aldy. Sonymen qatar «Muftiyat» baspasynan jaryq kórgen «Munara» gazeti men «Iman» jýrnalyn tabystady.

Aıta ketsek, dinimizde ata-anaǵa, úlkenge qurmet kórsetýge aıryqsha mán beriledi. Quran Kárimde: «Ata-analaryńa jaqsylyq jasańdar» («Isra» súresi, 23-aıat), – dep buıyrylǵan. Alla Elshisi (Oǵan Allanyń salaýaty men sálemi bolsyn): «Kishimizge meıirim kórsetpegen, úlkenimizdi qurmettemegen bizden emes», – degen (Tırmızı).

Qarııa – otbasynyń ǵana emes, tutas qoǵamnyń rýhanı qazynasy. Olardyń ómirlik tájirıbesi men aqyly keıingi býynǵa baǵyt-baǵdar berse, batasy elge bereke tilegen izgi nıettiń kórinisi.