Medrese-kolledjdiń jańa ǵımaraty paıdalanýǵa berildi (FOTO)
Din ǵulamalarynyń ortalyǵy bolǵan Taraz shaharynda «Hıbatýlla Tarazı» medrese-kolledjiniń jańa ǵımaraty qoldanysqa berildi. Saltanatty sharaǵa QMDB tóraǵasy, Bas múftı Naýryzbaı qajy Taǵanuly, oblys ákimi Berdibek Saparbaev, óńirdiń bas ımamy Beıbit Myrzageldıev jáne medrese ustazdary qatysty.
Alǵashqy bolyp kópshilik aldynda sóz sóılegen oblys ákimi: «Eldegi balalardy shetke jibermeı-aq óz óńirimizde dinı bilim bersek, qandaı jaqsy. Ǵımarat qazirgi zamannyń talabyna saı keremet salynǵan eken. Osy bilim ordasynda dinı bilim men dástúrli tárbıe berilip, ol ilim basqa jastarǵa úıretilse, adamnyń bir mindeti oryndaldy degen sóz» - dep atap ótti.
⠀
Al, QMDB tóraǵasy, Bas múftı Naýryzbaı qajy Taǵanuly óz kezeginde: «Taraz bul óte kóne shahar. Tarazdan shyqqan áýlıe-ámbıeler, ǵulamalar kóp bolǵan. Hıbatýlla at-Tarazı din taraǵan ortaǵa baryp, Mysyrda medrese basshylyǵyn atqarǵan uly tulǵa. Biz Mysyrda din mamandaryn oqytatyn jerdiń basshysy bolǵan abyroıly tulǵanyń urpaǵymyz. Allaǵa shúkir bul bir úlken is boldy. Shákirtterge bar jaǵdaı jasalǵan eken. Endi alańsyz bilim alýǵa jazsyn», - dedi Bas múftı.
Aq jaýlyqty ájeler shashýyn shashyp, Naýryzbaı Taǵanuly men Berdibek Saparbaev ǵımarattyń tusaýkeser lentasyn qıdy. Keıin qonaqtar medresemen tolyq tanysyp, ishin aralap shyqty.
«Hıbatýlla Tarazı» medrese-kolledjiniń jataqhanasynyń jalpy kólemi 40 sharshy metrden jáne japsarlas salynǵan eki qabatty ǵımarattan turady. 1-qabatta Holl (qonaq kútý), resepshn, kitaphana, 3 ustazdar bólmesi, ashana, kir jýatyn bólme, dárethana, úlken jýynatyn bólmesi jáne monsha ornalasqan. Al 2-qabatta 12 jatyn bólme jáne 4 synyp bar. Jataqhananyń batys jaǵynda 2 qyzmettik úı qamtylǵan. Bireýi 36 sharshy metr, ekinshisi 20 sharshy metr.
