Medrese túlekteri ıjaza aldy (FOTO)
Elordadaǵy «Astana medrese» kolledjiniń túlegi Asqar Ibadýllaev pen «Qaýam ad-Dın ál-Itqonı ál-Farabı at-Túrkistanı» respýblıkalyq qarılar daıarlaý ortalyǵynyń túlegi, qarı Murtaza Balahmet Quran Kárimniń «Asım» qyraǵaty – «Hafs» jáne «Shuǵba» rıýaıaty boıynsha ıjaza aldy.
Bul qýanyshty habarmen alǵash bolyp A.Ibadýllaevtyń ustazy, «Astana medrese» kolledji dırektorynyń birinshi orynbasary Qanat Ońǵarbaev bólisti.
«Ijaza – Quran oqýǵa ruqsat beretin kýálik. Sonaý Jábireıil (a.s.) perishteden Paıǵambarymyzǵa (oǵan Allanyń salaýaty men sálemi bolsyn), odan ardaqty sahabalarǵa, olardan tabıǵınderge, sóıtip-sóıtip Quran ilimin meńgergen ǵulama-hafızdardyń tizbegimen kele jatqan 10 qyraǵat bar. Sol on qyraǵattyń ishinde Orta Azııada Asım qyraǵatynyń Hafs rıýaıaty keńinen qoldanylady. Jyl saıyn medresemizde 2 stýdent Quran jattap otyrady. Iaǵnı, medrese qabyrǵasynda 3 jyl oqı júrip, kúndelikti ýaqyt bólip, Quran jattaýǵa múmkindik beriledi. Al Asqar Ibadýllaev osy ıjazaǵa qol jetkizý úshin eki jyl Quran jattap, bir jarym jyl Túrkııada on qyraǵat ıesi, ǵulama sheıh Osman Ashtyń janynda synaq tapsyrdy. Alla násip etip, Asqar shákirtimiz de, Murtaza qarıymyz da Asım rıýaıatynyń 2 qyraǵaty boıynsha ıjaza aldy», – deıdi Q.Ońǵarbaev.
