«Mektepke jol» aktsııasy 12000-ǵa jýyq oqýshyǵa qýanysh syılady
Elordada QMDB Tóraǵasynyń orynbasary, naıb múftı Ershat Aǵybaıulynyń jetekshiligimen «Zeket jáne qaıyrymdylyq» qorynyń IV toqsan jumysyn jandandyrýǵa arnalǵan onlaın jınalysy ótti.
Jınalys barysynda naıb múftı Ershat Aǵybaıuly zeket jumysyn jandandyrýǵa baılanysty baǵyt-baǵdar berip, qoǵamdaǵy zekettiń orny, ushyrdyń mańyzdylyǵy, tórt-túlik maldyń zeketi, saýda taýarlarynyń zeketin nasıhattaý saýaby mol, ári jaýapty is ekenin eske salyp ótti.
QMDB «Zeket jáne qaıyrymdylyq» qorynyń dırektory Talǵat Seıtkárimuly sóz kezegin alyp, zeket ókilderiniń eren eńbegine, ásirese, eldi qýańshylyq jaılaǵan sátte «Qıyndyqta el birge» jobasyn uıymdastyryp, Qyzylorda, Aqtóbe oblystarynda atqarylǵan jumystarǵa, «Mektepke jol» aktsııasy boıynsha 12000-ǵa jýyq áleýmettik az qamtylǵan otbasylardyń balalaryna mektep qural-jabdyqtarymen kómek berilgenin, ózge de aýqymdy qaıyrymdylyq jumystaryn joǵary baǵalap, alǵys bildirdi.
Jınalys barysynda kún tártibindegi birqatar máseleler talqylandy. Atap aıtsaq, «Ómirge úmit syıla», «El úlesi – páterge» jáne t.b. aýqymdy jobalar jumysyn jandandyrýǵa baılanysty tapsyrmalar men baǵyt-baǵdar berildi.
