MÚFTIIaT BASPASYNAN ShYQQAN JAŃA KITAPTARDYŃ TANYSTYRYLYMY ÓTTI

Búgin Astana qalasynda Qazaqstan musylmandary dinı basqarmasy janyndaǵy «MUFTIYAT» baspasynan jaryq kórgen birqatar jańa eńbektiń tanystyrylymy ótti.

Atap aıtqanda, «Iman maǵynasy» kitabynyń 9-tomy, «Bádál qaj» eńbeginiń 4-basylymy, «Islam Entsıklopedııasynyń» III tomy men «Imam Ábý Hanıfanyń hadıstegi orny» kitaby (avtorlary – Islam Qaıýpov, Baǵlan Shejimbaı) kópshilikke tanystyrylyp, tusaýy kesildi.

Saltanatty sharaǵa QMDB Tóraǵasy, Bas múftı Naýryzbaı qajy Taǵanuly, Parlament depýtattary, qoǵam qaıratkerleri, sheteldik dıplomattar men din qyzmetkerleri qatysty.

Bas múftı óz sózinde dinı ádebıetterdi ázirleý men nasıhattaýdyń mańyzyna toqtalyp:
«Múftııat qurylǵan kúnnen bastap rýhanı-aǵartýshylyq baǵyttaǵy jumystardyń bir tarmaǵy retinde kitap shyǵarý isine aıryqsha mán berip keledi. Búginde “MUFTIYAT” baspasy arqyly 90-ǵa jýyq eńbek jaryq kórdi.

Táýelsizdiktiń 35 jyldyǵyna oraı júzege asyrylyp jatqan “35 aıtýly shara” jospary aıasynda “Rýhanı kitap aılyǵy” jobasyn bastadyq. Bul bastama kitap oqý mádenıetin arttyrýǵa, dinı saýatty nyǵaıtýǵa baǵyttalǵan», – dedi.

Sonymen qatar jıyn barysynda QMDB-nyń rýhanı-aǵartýshylyq baǵyttaǵy jobalary tanystyrylyp, arnaıy beınerolık kórsetildi.

Tusaýkeserge qatysqan zııaly qaýym ókilderi jańa eńbekterdiń el rýhanııaty úshin mańyzyn atap ótip, ıgi bastamaǵa qoldaý bildirdi.

​