«MUNARA TV» TELEARNASYNA JAŃA DIREKTOR TAǴAIYNDALDY
QMDB Tóraǵasy, Bas múftı Naýryzbaı qajy Taǵanuly hazrettiń buıryǵymen Qazaqstan musylmandary dinı basqarmasynyń tól telearnasy «MunaraTV» telearnasynyń dırektory qyzmetine Beken Qasymhan Talǵatuly taǵaıyndaldy.
Naýryzbaı qajy Taǵanuly jańa dırektordyń jaýapty qyzmetine sáttilik tilep, telearnanyń qoǵamdaǵy rýhanı-aǵartýshylyq qyzmetiniń mańyzyn atap ótti jáne ulttyq qundylyqtar men dástúrli ıslamdy nasıhattaý baǵytyndaǵy jumystardy odan ári jandandyrý qajettigine toqtaldy.
Qasymhan Talǵatuly buqaralyq aqparat quraldary salasynda kóp jyldan beri qyzmet etip keledi. Ár jyldary «Almaty» teleradıokompanııasy» AQ-da aqparattyq-saraptamalyq baǵdarlamalar bóliminiń júrgizýshi-tilshisi, «QAZAQSTAN» ulttyq telearnasynyń Almaty fılıalyndaǵy «Tańsholpan» tańǵy aqparattyq baǵdarlamalar bóliminiń redaktory, «Habar» agenttiginiń «24KZ» arnasynda jańalyqtar bóliminiń II sanatty telejúrgizýshisi, sondaı-aq «Astana» telearnasynda «Astana Times» jańalyqtar baǵdarlamasynyń telejúrgizýshisi, QMDB tilshisi qyzmetterin atqarǵan.
Óz kezeginde jańa dırektor kórsetilgen senim úshin alǵys bildirip, telearnanyń shyǵarmashylyq áleýetin arttyrýǵa, sapaly rýhanı-aǵartýshylyq kontent ázirleýge jáne kórermen aýdıtorııasyn keńeıtýge kúsh salatynyn jetkizdi.
Aıta keteıik, «MunaraTV» telearnasy Qazaqstan musylmandary dinı basqarmasynyń aqparattyq-aǵartýshylyq baǵyttaǵy jobalaryn nasıhattap, ulttyq jáne rýhanı qundylyqtardy dáripteýge úles qosyp keledi.
