MYSYRDA «ÁZ-ZAHIR BEIBARYS» MEShITI AShYLDY (FOTO)

Búgin Mysyr Arab Respýblıkasynyń astanasy Kaır qalasynda «áz-Zahır Beıbarys» meshitiniń saltanatty ashylý rásimi ótti.

Qazaqstan men Mysyr memleketi úshin tarıhı is-sharaǵa osy eldiń Ýaqyp mınıstri Muhammed Muhtar Juma, QR Parlamenti Senatynyń tóraǵasy Máýlen Áshimbaev, Kóne muralar boıynsha Joǵarǵy keńesiniń bas hatshysy Mustafa Ýazırı, Mysyr múftıi, doktor Shaýqı Ibrahım Allam, ál-Azhar sheıhy Ahmet Taıyp jáne QMDB Tóraǵasy, Bas múftı Naýryzbaı qajy Taǵanuly qatysyp, sóz sóıledi.

«Kaır shahary – Islam mádenıeti men órkenıetiniń ortalyǵyna aınalǵan qala. Mine, osyndaı máshhúr qalada Beıbarys babamyzdyń meshiti el ıgiligine berilip otyr. 

Bul meshittiń tarıhy tereńde jatyr. Meshitti sonaý 1266 jyly Beıbarys sultannyń ózi saldyrǵan bolatyn. Mámlúk sáýlet óneri úlgisinde boı kótergen «áz-Zahır Beıbarys» meshiti keıingi aýmaly-tókpeli dáýirlerde qıyn jaǵdaıdy bastan keshti. Munarasy qulatylyp, áskerı kazarmaǵa, keıin naýbaıhanaǵa aınalǵan kezi de boldy. 

Qazaqstan Táýelsizdigin alyp, Mysyrmen arada dıplomatııalyq baılanys ornady. 1993 jylǵy sáýirde Qazaqstannyń Mysyrdaǵy elshiligi ashylyp, Qazaqstan jáne Mysyr Úkimetteri arasynda ortaq kelisimder qabyldandy. Osylaısha eki elge ortaq tarıhı mura «áz-Zahır Beıbarys meshitiniń» jóndeý jumystary qolǵa alyndy. Mine, endi jóndeý aıaqtalyp, qulshylyq úıi jamaǵatqa esigin ashqaly otyr. Bul da bolsa eki el arasyndaǵy berik baılanystyń nátıjesi dep bilemiz» dedi Bas múftı. 

Sondaı-aq saltanatty rásimde QMDB Tóraǵasy Naýryzbaı qajy Taǵanuly tarıhı meshitte jıyrma jyldan beri úzdiksiz qyzmet etip kele jatqan Doktor Hısham Kamıldiń ıyǵyna shapan jaýyp, qurmet kórsetti. Al Mádenıet jáne sport mınıstri Ashat Oralov meshittiń azanshysynyń ıyǵyna shapan japty.

Aıta keteıik, tarıhı meshit qaıtadan tolyqtaı jóndeýden ótti. Búginde Kaır qalasynyń eń úlken meshitteriniń biri sanalady. Meshitke kelýshi jamaǵatqa tarıhı nysannyń eski sýretteri usynyldy.

Basty sýret inform.kz saıtynan alyndy