Naıb múftı Almaty ımamdarymen onlaın jıyn ótkizdi (FOTO)
QMDB Tóraǵasynyń orynbasary, naıb múftı Ershat Aǵybaıulynyń qatysýymen Almaty qalasy ımamdarynyń onlaı jıyny ótti.
Rýhanı tárbıe «Ihsan ilimi» baǵytynda ótken jıynǵa Sharıǵat jáne pátýa bóliminiń meńgerýshisi Sansyzbaı Qurbanuly men «MUFTIYAT» baspasynyń dırektory Murat Manapuly qatysty.
Naıb múftı tórt ret ótken Imamdar forýmynda qabyldanǵan kontseptýaldy qujattarmen aldymen ımamdarymyz tanysyp, «Ihsan» ilimi, «Tolyq adam» kontseptsııasy boıynsha túrli formatta kezdesýler, dóńgelek ústelder, semınarlar ótkizip, sondaı-aq BAQ betterinde maqalalar, suqbattar jarııalaýy kerektigin atap ótti.
«Ózderińiz bilesizder, biz keshe musylman bolǵan joqpyz. Bizdiń asyl dinimizdiń tarıhy tereńde jatyr. Babalarymyz senim máselesin de, fıqh negizderin de nasıhattap, urpaqqa amanat etti. ıhsan ilimi arqyly elimizdegi musylman qaýymǵa dinimizdiń ádep negizderin úıretý jáne rýhanı tárbıeniń mańyzdylyǵyn kórsetý – Dinı basqarmanyń mindeti. Jamaǵat kez kelgenniń jetegine erip kete bermeı, tárbıelik joldy ustansa, qoǵam da, ǵıbadatyn atqaryp otyrǵan jamaǵat ta adaspaı, durys jolda bolar edi. Ol úshin QMDB qyzmetkerleri qoǵamǵa aýadaı qajet bolyp otyrǵan ıhsan ilimin nasıhattaýdy qolǵa alý kerek. Alla qalasa jýyrda «Ihsan ilimi», «Kemel adam» taǵy basqa birqatar kitaptardy shyǵaramyz» dedi.
Al sóz kezegin alǵan ıslamtanýshy-ǵalym Sansyzbaı Qurbanuly ıhsan ilimin aldymen din qyzmetkerleri, ımamdar ózderi jete túsinip, boılaryna sińirýge tıis ekenin basa aıtty. Onyń aıtýynsha, «Qudaı kórip tur» degen senim din qyzmetkerleriniń júreginen oryn taýyp, jumysyna jaýapkershilikpen, otbasyna qamqorlyqpen, mańaıyna janashyrlyqpen qaraı alsa, minezin kórkemdeı alsa, onyń nasıhaty da elge ótimdi bolady, osylaısha qoǵam túzeledi.
Sondaı-aq «MUFTIYAT» baspasynyń dırektory Murat Manapuly respýblıka kóleminde rýhanı tárbıe «Ihsan ilimi» baǵytynda atqarylyp jatqan jumystarǵa qysqasha toqtalyp, Bas múftı Naýryzbaı qajy Taǵanulynyń bastamasymen daıyndalyp jatqan «Ihsan ilimi» jáne «Kemel adam» kitaptarynyń mazmunymen keńinen tanystyryp ótti.
Jıyn sońynda Almaty qalasynyń bas ımamy Erkinbek Shoqaı men ózge de ımamdar uıymdastyrýshylarǵa alǵysyn bildirip, usynys-tilekterin jetkizdi.
