Naıb múftı «Halal damý» mamandarymen birqatar máseleni talqylady (FOTO)
Elordada QMDB Tóraǵasynyń orynbasary, naıb múftı Ershat qajy Aǵybaıulynyń qatysýymen «Halal Damý» mamandarynyń kezekti jıyny ótti.
Basqosýǵa «Halal Damý» dırektory Aıbek Asqarbekuly, ujym mamandary men jergilikti ókilder qatysty.
«Islam – musylmandarǵa ómirdiń barlyq salasyn túgel qamtyp, basshylyqqa alatyn sharıǵat sheńberin aıqyn kórsetip bergen din. Dinı basqarmanyń aıryqsha den qoıǵan salasy – halal. Halal uǵymy dinı másele bolǵandyqtan, QMDB standarttaý jáne sertıfıkattaý óz jumysyn júrgizýde basqa uıymdarmen básekelestikti emes, sharıǵat talaptarynyń tolyq oryndalýyn kózdeıdi. Aǵyl-tegil, kól-kósir nyǵmetterdi quldaryna bergen Rabbymyz solardyń adalyn paıdalanyp, al aramynan aýlaq bolýdy Quranda qatań eskertken: «Áı, adamdar! Jer betindegi nárselerdiń halal ári tazasynan jeńder!» («Baqara» súresi, 168-aıat). Sondyqtan da, halal ónimderine qatysty týyndaǵan máselelerdi sharıǵat talaptaryna saı júıeleý – basty mindetterdiń biri. Halal sertıfıkat berýde báseke emes, sharıǵat talabyn oryndaý asa mańyzdy», – degen Ershat Aǵybaıuly kún tártibindegi máselelerdi kóterdi.
Kún tártibinde aılyq tekseris jumystaryn júıeli túrde ótkizýdi qadaǵalaý, kásiporyndarda sanıtarlyq-Epıdemıologııalyq tazalyq sharalaryn jaqsartý, aqparattyq-nasıhat sharalaryn kúsheıtip «QMDB halal» standarty boıynsha jumys jasaýǵa shaqyrý máseleleri talqylandy.
«Bizdiń alar asýymyz, baǵyndyrar belesimiz áli alda. Búgingi jıynymyz da bolashaqtaǵy josparlarymyzdy júıelep, baǵdarymyzdy belgileý maqsatynda uıymdastyrylyp otyr. Búgingi kúni 700-ge jýyq kásiporyn 28 baǵyt boıynsha sertıfıkattaldy. Biz úshin san emes, sapa mańyzdy. Alaıda, kúndelikti qoldanystaǵy, halyqqa qajetti halal ónimder sanyn arttyrýymyz qajet. Sol sebepti óńirińizdegi kásiporyndar sanyn kóbeıtip, aqparattandyrý sharalaryn nyǵaıtamyz», – dedi Aıbek Asqarbekuly.
