Naıb múftı «Halal damý» jıynyn ótkizdi (FOTO)
Búgin QMDB tóraǵasynyń orynbasary, naıb múftı Ershat qajy Aǵybaıulynyń qatysýymen «Halal Damý» mamandarynyń kezekti onlaın jıyny ótti. Basqosýǵa «Halal Damý» dırektory Aıbek Asqarbekuly, ujym mamandary men jergilikti ókilder qatysty.
«Dinı basqarmanyń aıryqsha den qoıǵan salasy – halal. Halal uǵymy dinı másele bolǵandyqtan, bul jumyspen QMDB aınalysqany jón. QMDB standarttaý jáne sertıfıkattaý jumysyn júrgizýde basqa uıymdarǵa básekelestikti emes, sharıǵat talaptarynyń tolyq oryndalýyn kózdeıdi jáne halal ónimderine qatysty týyndaǵan máselelerdi sharıǵat talaptaryna saı júıeleý – basty mindetterdiń biri. Halal sertıfıkat berýde báseke emes, sharıǵat talabyn oryndaý asa mańyzdy» dedi Ershat Aǵybaıuly.
Kún tártibinde aılyq tekseris jumystaryn júıeli túrde ótkizýdi qadaǵalaý, kásiporyndarda sanıtarlyq-Epıdemıologııalyq tazalyq sharalaryn jaqsartý, «Halal Guide» mobıldi qosymshasymen tanystyrý, ár óńirdegi iri kásiporyndardy «QMDB halal» standarty boıynsha jumys jasaýǵa shaqyrý máseleleri talqylandy.
«Bizdiń alar asýymyz, baǵyndyrar belesimiz áli alda. Búgingi jıynymyz da bolashaqtaǵy josparlarymyzdy júıelep, baǵdarymyzdy belgileý maqsatynda uıymdastyrylyp otyr. Búgingi kúni 500-ge jýyq kásiporyn 28 baǵyt boıynsha sertıfıkattaldy. Biz úshin san emes, sapa mańyzdy. Alaıda, kúndelikti qoldanystaǵy, halyqqa qajetti halal ónimder sanyn arttyrýymyz qajet. Sol sebepti óńirińizdegi kásiporyndar sanyn kóbeıtýge barynsha at salysýlaryńyzdy suraımyn» degen Aıbek Asqarbekuly óńirlik ókilderge mańyzdy tapsyrmalar júktedi. Sonymen qatar aldaǵy ýaqytta «Halal Damý» mamandary medıtsına jáne farmatsevtıka baǵyty boıynsha bes standart daıyndalyp jatqandyǵyn jetkizdi.
