Naıb múftı halyqaralyq onlaın-konferentsııaǵa qatysty
Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵy el Táýelsizdiginiń 30 jyldyǵy qarsańynda halyqaralyq deńgeıdegi taqyryptyq konferentsııalar toptamasyn iske qosty.
Búgin «PeaceTalks» dıskýssııa alańy sheńberinde «Dinı lıderlerdiń turaqty álem damýyna qol jetkizýdegi róli» taqyrybynda bıylǵy alǵashqy halyqaralyq onlaın-konferentsııasy ótti.
Oǵan elimizdiń memlekettik organdary men dinı birlestik ókilderi, Álemdik jáne dástúrli dinder lıderleriniń sezi Hatshylyǵynyń músheleri, aldyńǵy qatarly sheteldik sarapshylar jáne Saýd Arabııasy Koroldigi, Mysyr Arab Respýblıkasy, Vatıkan, Úndistan, Ulybrıtanııa, Reseı Federatsııasy, Ózbekstan men Iran Islam Respýblıkasy halyqaralyq uıymdarynyń jetekshi spıkerleri qatysty.
Onlaın-konferentsııanyń ashylýynda Aqparat jáne qoǵamdyq damý vıtse-mınıstri Marat Ázilhanov qatysýshylarǵa Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń jańa Basqarma Tóraǵasy Sársenbaev Bolat Serǵazyulyn tanystyryp ótti.
Al QMDB Tóraǵasynyń orynbasary, naıb múftı Ershat qajy Aǵybaıuly konferentsııaǵa qatysýshylarǵa Bas múftı Naýryzbaı qajy Taǵanulynyń sálemin jetkizip, arnaıy baıandama jasady. Álemdik dinderdiń beıbitshilik pen turaqty damýǵa qosatyn úlesiniń orasan ekenin, al Islam – kez-kelgen qoǵamdy beıbitshilikke, órkenıetke jeteleıtin ómirsheń din ekenin aıta kele, el Táýelsizdiginiń torqaly toıyna oraı QMDB-nyń josparǵa qoıǵan ıgi is-sharalardy tilge tıek etti.
«Biz dinı saladaǵy qyzmetimizde aıtýly mereıtoı qarsańynda 12 qaıyrymdylyq is-shara, 11 shyǵarmashylyq baıqaý, 10 forým men konferentsııa, 2 sporttyq saıys uıymdastyryp, 12 kitap shyǵarýdy josparlap otyrmyz» dedi Ershat qajy Aǵybaıuly.
