Naıb múftı qasapshylarǵa semınar ótkizdi (FOTO)
QMDB Tóraǵasynyń orynbasary, naıb múftı Ershat Ońǵardyń tóraǵalyǵymen qasapshylarǵa arnalǵan respýblıkalyq onlaın oqý-semınary ótkizildi.
«Qasapshylyq – saýapty hám jaýapty is» oqý-semınaryna QMDB «Halal Damý» dırektory Aıbek Asqarbekuly, Sharıǵat jáne pátýa bólimi meńgerýshisiniń orynbasary, RANT múshesi Hasan Amanqulov, «Halal Damý» veterınarııalyq sanıtarııa isiniń mamany Danııar Safıev jáne respýblıka boıynsha «QMDB halal qasapshy» kýáligin alǵan, alýǵa nıet bildirgen qasapshylar, Almaty oblysynda ornalasqan qusfabrıkalarynyń qyzmetkerleri jalpy sany 60-qa jýyq tyńdarman qatysty.
«Alla Taǵala Quranda: «Senderge: ólekse, aqqan qan, dońyz eti jáne Alladan basqanyń atymen baýyzdalǵan mal haram qylyndy. Jáne býynyp, urylyp, qulap, súzilip ólgen maldar jáne jyrtqysh jegen mal haram…» Bulardyń bárin jeýge bolmaıdy, «… biraq (jany shyqpaı) baýyzdalǵandardan basqa» degen. Maldy Alla Taǵala adam yrzyǵy úshin jaratqan desek te onyń ózinshe baýyzdaý tártibi, mindeti bar. Sondyqtan mal soıý kezinde saqtalý qajet bolǵan negizgi sharttardy tereńirek túsindirý úshin mamandardyń qatysýymen respýblıkalyq qasapshylar semınaryn ótkizýdi jón kórdik. Adam balasynyń qajetine jaratylǵan janýarlar sharıǵat jolymen soıylmaıynsha halal bolmaıdy. Endeshe, Alla barshamyzdyń qyzmetimizge bereke berip, saýaptardan jazǵaı!» degen Ershat Aǵybaıuly semınarǵa qatysýshylarǵa sáttilik tilep, paıdaly bilim alýǵa shaqyrdy.
«Paıǵambarymyzdyń (oǵan Allanyń salaýaty men sálemi bolsyn): «Alla Taǵala barlyq nárseni jaqsylap isteýdi buıyrdy, sondyqtan maldy soısańdar, durystap soıyńdar», – degen sózi bar. Qazaq «taýyq soısa da qasapshy soısyn» degen. Bir kózben qaraǵanda mal soıý – ońaı is sekildi. Alaıda kópshilik mán bere bermeıtin, sharıǵatymyzda bekitilgen, halal standartymyzda naqtylanǵan mal baýyzdaýdyń ózindik talaptary men erekshelikteri bar. Osy jóninde sizderge óz isiniń sheberleri sharıǵat mamany men veterınarııalyq sanıtarııa mamany keńinen túsindirip, tarqatyp aıtady» – dedi Aıbek Asqarbekuly.
Óz kezeginde mamandar qasapshylarǵa sharıǵat talaptaryna sáıkes mal soıýdyń jón-josyǵyn túsindirip, qatysýshylar suraqtaryna jaýap berdi. Esterińizge sala keteıik, Bas múftıdiń bastamasymen elimizdiń ár túpkirinde qasapshylarǵa arnalǵan «Qasapshylyq – saýapty hám jaýapty is» semınary turaqty túrde ótkizý qolǵa alynǵan bolatyn.
