«Namaz oqyp úıreneıik» kitapshasy oqyrmanǵa jol tartty (FOTO)
Asyl dinimiz Islamda qulshylyq-ǵıbadattyń ishinde eń ulyǵy – namaz. Musylman adam Allaǵa namaz arqyly jaqyndaıdy. Óıtkeni, namaz – dinniń tiregi, rýh pen tánniń azyǵy.
Qazaqstan musylmandary dinı basqarmasy janyndaǵy «Mýftııat» baspasy elimizdegi musylman jamaǵatynyń rýhanı suranysyn qanaǵattandyrý maqsatynda «Namaz oqyp úıreneıik» kitapshasyn shyǵardy.
Kitapshada dáret alý úlgisi men bes ýaqyt namaz oqýdyń tártibi, sonymen qatar namazda oqylatyn duǵalar men súreler jazylǵan.
«Mýftııat baspasynyń» dırektory Murat Manapulynyń aıtýynsha, eńbektiń ereksheligi – qazirgi zamannyń talaptaryna sáıkes, kitaptan QR kod arqyly mobıldi qosymshany júktep alyp, namaz oqýdyń beıne úlgisin kórýge bolady. Beıne rolık namaz oqýdy nıet etken musylman qaýymǵa kómekshi qural bolmaq.
Kitapshaǵa memlekettik dintaný saraptamasynyń, sonymen qatar Qazaqstan musylmandary dinı basqarmasy janyndaǵy saraptaý komıssııasynyń oń qorytyndysy berilgen. Kitapsha jasóspirimder men eresekterge, jalpy oqyrman qaýymǵa arnalǵan.
