Naýaı ýálaıaty ákimimen kezdesti (FOTO)
Elimizdiń týrıstik operatorlar ókilderi qatysyp jatqan Ózbekstandaǵy aqparattyq týrıstik sapar Naýaı ýálaıatynda (oblysynda) jalǵasty.
Bul ýálaıat buryn Buhar handyǵyna qarady. 1958 jyly munda taý-metallýrgııa salynyp, jańa shahar boı kóterdi. Qalaǵa Shyǵystyń shaıyry Álisher Naýaıdiń aty berildi. Is-shara aıasynda QMDB Qajylyq bóliminiń meńgerýshisi Jándillá Bekjigitov pen «Tawaf Travel» qajylyq kompanııasynyń dırektory Bektemir Iskakov Naýaı ýálaıatynyń ákimi Kobýl Týrsýnovpen kezdesti.
Kezdesýde Kobýl Beknazaruly Naýaı ýálaıaty uıymdastyryp otyrǵan sharanyń mańyzdylyǵyna toqtaldy. Óz kezeginde QMDB Qajylyq bóliminiń meńgerýshisi Jándillá Bekjigitov Ózbekstan jerinde, sonyń ishinde Naýaı ýálaıaty aýmaǵynda jatqan qazaqtyń ataqty tulǵalarynyń eki el týrızmi úshin de qundy ekenin atap ótti.
«Ózińiz basshylyq etetin bul óńirde týrıster úshin qundy kóptegen qasıetti oryndar bar. Atap aıtqanda, Nur Ata qalasynda qazaq halqynyń birligin nyǵaıtýǵa úlken úles qosqan Áıteke bı Baıbekulynyń, Shyǵaı hannyń keńesshisi bolǵan taǵy bir ataqty bıimiz Seıitqul qajy Toqpanulynyń kesenesi bar. Al Chashma aýdanynda sahabalardyń serigi bolǵan ataqty tabıǵın Ahmad ıbn Mýhammad Abdýl Hasan men qyzy Nurgúl bıbi jerlengen. Nurgúl bıbi zıraty qazirgi ýaqytta qyz-kelinshekterdiń jıi keletin zııarat ornyna aınalyp otyr. Osyndaı qasıetti oryndar týrıster úshin óte mańyzdy» dep atap ótti Jándillá Bekjigitov.
Kobýl Týrsýnov sóz sońynda meımandarǵa ystyq alǵysyn bildirip, Naýaı ýálaıatynyń ishki týrızmin damytý qajettigin ataı kelip, osy mańyzdy iske qazaqstandyq týrızm mekemelerin atsalysýǵa shaqyrdy.
