Naýryzbaı qajy Taǵanuly Assambleıa múshelerimen kezdesti (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Taldyqorǵan qalasyna sapary barysynda óńirdegi Assambleıa múshelerimen kezdesti.
Jıynda ulttar tatýlyǵy, rýhanı sabaqtastyq jaıynda sóz qozǵaldy.
–Búkil adamzat balasynyń ulttar bolyp, qaýymdasyp ómir súrýi, bir-birinen erekshelep jaratylýy – Jaratýshy Alla Taǵalanyń danalyǵy, meıirimi men nyǵmeti. Saıyn dalany meken etken túrli ult ókilderi salt-dástúrin, ádebıeti men mádenıetin damytýǵa erikti.
Búginde Eýrazııa júreginde beıbit ǵumyr keship kele jatqan Qazaqstan tórtkúl dúnıege bitimger, araǵaıyn, ymyrashyl irgeli el retinde tanyldy. Elimizdiń turaqty damý júıesinde mańyzdy tutqa bolyp tabylatyn Qazaqstan halqy Assambleıasy barlyq Etnostardy ortaq maqsatqa jumyldyrǵan, búkil álemge úlgi bolǵan biregeı ıdeıa. Beıbitshilikti tý etip, myzǵymas birlikti maqsat tutqan Assambleıa ulttardy yntymaqqa uıystyrýdyń álemdik tájirıbesine enýde.
Elimizde Elbasy Nursultan Nazarbaevtyń bastamasymen «Rýhanı kelisim» kúni belgilenip, osy dataǵa mańyz berilip jatqan jaıttyń da ózindik aıryqsha orny bar. Kelisimsiz keleshek kemel bolmaıtyny beseneden belgili, tarıhtan da aıqyn ańǵaramyz. Rasynda da dástúrli dinderdiń maqsaty – qoǵamǵa adamgershilik qundylyqtaryn nasıhattaý, - dedi Bas múftı.
Kezdesýge kelgen Assambleıa músheleri qazaq jerinde ómir súrip jatqan túrli ulttar men ulystardyń, din ókilderiniń rýhanı kelisimde bolýyna Qazaqstan musylmandary dinı basqarmasynyń da yqpaly zor ekenin atap ótti.
Jıyn sońynda Bas múftı konfessııaaralyq dinı turaqtylyqty saqtaýǵa úles qosyp, meshit isterinde árdaıym janashyrlyq tanytyp júrgen birqatar Assambleıa múshesine alǵys bildirip, estelik syılyq tabys etti.
