Naýryzbaı qajy Taǵanuly: Dinı basqarma otyz jylda rýhanı ordaǵa aınaldy (FOTO)
Búgin elordada Qazaqstan musylmandary dinı basqarmasynyń 30 jyldyq mereıtoıyna oraı bastalǵan halyqaralyq konferentsııada negizgi baıandama jasaǵan Bas múftı Naýryzbaı qajy Taǵanuly osylaı dedi.
«2020 jyldyń 12 qańtarynda Qazaqstan musylmandary dinı basqarmasynyń qurylǵanyna 30 jyl toldy. Shırek ǵasyrdan astam merzimde elimizde 2714 meshit ashyldy. Salamyzdaǵy qyzmetker sany 4 myńnan asty. 9 medrese-kolledj ben 6 qarılar daıarlaý ortalyǵy ashyldy. «Nur Múbárak» ýnıversıteti men Islam ınstıtýtynyń jemisti eńbeginiń arqasynda kadr tapshylyǵy tolyq sheshildi.
Biz 30 jyldyq mereke aıasynda baspanaǵa asa muqtaj 30 otbasyǵa páter kiltin tabystadyq. Jomart jandardyń demeýshiligimen 30 eldi-mekenge kópir saldyq. Oqýda ozat bolǵan, kómekke zárý otbasydan shyqqan 30 shákirtke múftııat grantyn tabystadyq. Respýblıka boıynsha 30 myń aǵash kóshetin otyrǵyzdyq. «Ómirge úmit syıla» aktsııasy aıasynda 1000-ǵa jýyq ókpeni jasandy tynystandyratyn apparattardy tıisti oryndarǵa jetkizdik. Budan basqa óńirlerde túrli deńgeıde qaıyrymdylyq sharalar júzege asty. Dinı basqarma 30 jylda rýhanı ordaǵa aınaldy.
Biz bul jumystarmen toqtap qalmaı, dinı aǵartý baǵytynda úlken jobalardy qolǵa aldyq. 2020 jyldyń 10 qarashasynda Memleket basshysy Qasym-Jomart Toqaevtyń qabyldaýynda bolyp, jamaǵat arasynda «Ihsan» ilimin, al jalpy halqymyzǵa Abaıdyń kemel adam kontseptsııasyn keńinen nasıhattaý jaıly bastamamdy jetkizdim. Prezıdentke Qazaqstanda Islam akademııasyn qurý, Islam jáne teologııa kitaphanasyn salý, elimizdegi meshitterdiń arhıtektýrasyn qazaqy salt-sanaǵa saı qalyptastyrý týraly usynystarymdy aıttym.
Qasym-Jomart Kemeluly bul usynystarymdy qoldap, Dinı basqarmanyń izgi is-sharalaryn joǵary baǵalap, ıgi tilegin bildirdi» dep atap ótti Naýryzbaı qajy Taǵanuly.
