Naýryzbaı qajy Taǵanuly Saraıshyqta han ordasyn zııarat etti (FOTO)
Bas múftı Naýryzbaı qajy Taǵanuly Atyraý oblysyna jasaǵan saparynda Mahambet aýdany Saraıshyq aýylynda ornalasqan han ordasyna zııarat etip, meshitte ata-baba rýhyna Quran baǵyshtady. Elimizdiń amandyǵy men jerimizdiń tynyshtyǵy úshin duǵa jasady.
Bas múftı bastaǵan delegatsııa múshelerine tarıh ǵylymdarynyń doktory, professor Ábilseıit Muhtar Saraıshyq aýylynda júrgizilip jatqan qazba jumystarymen tanystyrdy. Sonymen qatar jýyrda jer astynan tabylǵan qabir týraly baıandap berdi.
Aıta ketsek, qalashyqtyń orny Atyraýdan 50 shaqyrym qashyqtyqta Mahambet aýdanynyń Saraıshyq aýylynyń aýmaǵynda ornalasqan. Munda 1999 jyly «Han ordasy – Saraıshyq» memorıaldy kesheni salynyp, bıiktigi 17 metr kesene turǵyzylǵan. «Qazaqstannyń kıeli jerleri» geografııalyq kartasyna engen tarıhı oryndy búginde týrıstik nysanǵa aınaldyrý baǵytynda jumystar júrgizilýde.
