Naýryzbaı qajy Taǵanuly «Shıeli» qaıyrymdylyq mekemesin ashty (FOTO)
Qyzylorda oblysyna jumys sapary aıasynda QMDB tóraǵasy Naýryzbaı qajy Taǵanuly Shıeli aýdanyna arnaıy kelip, aýdan ákimi Qambarbek Amangeldiulymen birge qaıyrymdylyq mekemesiniń ashylýyna qatysty.
Ortalyqta birneshe oqý bólmesi jáne shákirtterge arnalǵan jatyn bólme bar. Mekemeniń ashylýynda sóz alǵan Bas múftı Naýryzbaı qajy Taǵanuly saýapty iske atsalysqan barsha azamattarǵa rızashylyq bildirdi.
«Syr óńiri – jurty uıysqan, ulty tatý jer. Bul óńirdiń qaı isinde de bereke bar. Endi mine, aımaqtyń qaıyrymdy azamattary qaıyrymdylyq mekemesiniń ashylýyna sep bolyp otyr. Qazaqstan musylmandary dinı basqarmasynyń bir baǵyty – qaıyrymdylyq. Alla qalasa, osy ortalyqtan bilimdi de bilikti qarılar, saýatty da salıqaly urpaq ósip shyqsyn», – dedi Bas múftı.
Saltanatty shara sońynda QMDB Tóraǵasy qaıyrymdylyq mekemesin aralap, tanysty. Aıta keteıik, Bas múftıdiń Qyzylorda oblysyna sapary erteń birneshe aýdanda jalǵasady.
