Naýryzbaı qajy Taǵanuly Syr jastarymen júzdesti (FOTO)
Qyzylorda oblysyna resmı issaparmen kelgen QMDB Tóraǵasy, Bas múftı Naýryzbaı qajy Taǵanuly Syr óńiriniń belsendi jastarymen kezdesti.
Aldymen Bas múftı Qyzylorda qalasynyń sol jaǵalaýynda ornalasqan Jastar resýrstyq ortalyǵynyń tynys-tirshligimen tanysty.
Budan keıin óz salalarynda jetistikke jetip, qoǵam ómirine belsene aralasyp júrgen Syr jastarymen ótken kezdesýde erkin áńgime órbip, aımaqtaǵy jastar saıasatyna qatysty ózekti máseleler tóńireginde pikir almasty.
«Jastyq shaq – adam balasynyń eń tartymdy ári eń belsendi kezeńi. Ómirdiń shyńy, qaırat-jigerge toly, jalyndaǵan shaq. Tepse, temir úzer kúsh-qýaty tasyp turǵan táýekelge toly kezeń. Bul jasta adam zerttelmegen jańa kókjıekterdi anyqtaýǵa, bıik armandarǵa jetýge tyrysady.
Jastyq shaq – qaıtyp kelmeıtin kóktem, aǵysy ózgermeıtin ózen, sondaı-aq, aspanda tek bir ret qana jarq etip kórinetin juldyz. Paıǵambarymyz (oǵan Allanyń salaýaty men sálemi bolsyn): «Qııamet kúni Allanyń eshbir quly ómirin, jastyq shaǵyn qalaı ótkizgendigi, dúnıe-múlkin qandaı joldarmen taýyp, qaıda jumsaǵandyǵy jáne alǵan bilimimen ne istegendigi jaıly esepke tartylmaıynsha bir adam da ornynan tapjylmaıdy» degen. Basqa bir hadıste:
«Bes nárse kelmeı turyp, bes nárseniń qadirin bilińder: ólmeı turyp ómirdiń qadirin, bir nársemen shuǵyldanbastan buryn bos ýaqyttyń, aýyrmaı turyp densaýlyqtyń, qartaımaı turyp jastyq shaqtyń, kedeılikten buryn baılyqtyń qadirin bilińder» degen.
Mine jastyq shaqtyń qadirin, ýaqytytń qadirin, densaýlyqtyń qadirin bilýge umtylaıyq. Adamnyń ǵumyry qashan bitetini belgisiz. Qazir oınap kúlip júrgen, byltyr Ramazanda birge aýyzashqan jandar qazir aramyzda joq. Sondyqtan ýaqytty baǵaly, mazmundy ótkizeıik. Jassyńdar, kúsh qaırat tasyp turǵanda eńbek etý kerek. Kóp múmkindik bar. Bastysy qulshynys» dedi Naýryzbaı qajy Taǵanuly.
