Naýryzbaı qajy Taǵanuly Túrkistanda bas ımamnyń jumys esebin tyńdady (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly kıeli Túrkistan oblysyna jasaǵan saparynda oblys bas ımamy Erkebulan Qaraqulovtyń jumys esebin tyńdady.
E.Qaraqulov Bas múftıge dinı ońaltý, qaıyrymdylyq is-sharalary, onlaın dárister, saýat ashý kýrstary, ýaǵyz-nasıhat jumystary boıynsha esep berdi. QMDB Tóraǵasy Naýryzbaı qajy Taǵanuly jyl basynda bekitilgen jeti baǵyt boıynsha, atap aıtqanda, aqparat jáne qoǵammen baılanys, ýaǵyz-nasıhat, qaıyrymdylyq, oqý-aǵartý jáne kadrlyq áleýet, rýhanı tárbıe – ıhsan ilimi, din men dástúr, jat dinı aǵymdarmen jumys júrgizýge jiti nazar aýdarýdy tapsyrdy. Sonymen qatar múftııat bastamasymen qolǵa alynǵan kıeli óńirlerde dinı týrızmdi damytý qajettegin aıryqsha atap ótti.
«Allaǵa shúkir, Túrkistan shahary kún sanap túlep keledi. Oǵan osy saparymyzda kýá boldyq. Munda kelýshi týrıster sany da kún saıyn ósýde. Kıeli qalanyń jańa kelbetimen tanysqysy keletinder «Túrkistan – Qoja Ahmet Iassaýı meshitine» soqpaı ketpeıdi. Osy rette kelýshilerge meshit tynysyn jan-jaqty tanystyryp, Qazaqstan musylmandary dinı basqarmasynyń Túrkistan keńsesi jumysy jaıly, din men dástúr sabaqtastyǵy, ıhsan ilimi týraly tolyqqandy málimet berilsin», – dedi Naýryzbaı qajy Taǵanuly.
Kezdesý sońynda Bas múftı óńir ımamdaryna naqty tapsyrmalar berdi.
