Nur-Múbarak stýdenti – qola júldeger
Nur-Múbarak ýnıversıtetiniń 3-kýrs stýdenti Ámir Qadyrov erler men áıelder arasynda dzıýdo kúresinen ótken Almaty oblysynyń chempıonatynda 100 keli salmaq dárejesinde qola júldeger atandy.
Almaty oblysynyń Dene shynyqtyrý jáne sport basqarmasynyń basshysy, Olımpıada júldegeri Nurbaqyt Teńizbaevtyń qolymen maqtaý qaǵazyna ıe bolǵan jas sportshy Ámir Qadyrovty ýnıversıtet basshylary da jeńisimen arnaıy quttyqtady.
Akademııalyq máseleler departamentiniń dırektory, dotsent Jalǵas Sandybaev: «Oqýmen qosa sporttyq báıgelerde oza shaýyp, ýnıversıtetimizdiń abyroıyn asyryp júrgen stýdentimiz Ámir Qadyrovty kezekti jeńis belesimen quttyqtap, árdaıym tuǵyryń bıikteı berýine tilekshimiz», – dep qýanyshyn bildirdi.
Jeńimpaz stýdent Ámir Qaıratuly: «Dodada jeńis tuǵyryna kóterilý men úshin zor qýanysh. Bilimde, sportta, jalpy kez-kelgen salada tabandylyq mańyzdy. Bastaǵan isti sońyna deıin, aqtyq shamań jetkenshe kúresý, óz nápsińmen, teris oımen, erinshektikpen kúresý, boıyńdaǵy keritartpa minezdermen kúresý jáne shalyńsan da, qulasań da, nátıjege jetseń de Allanyń qalaýymen bolǵany túsiný qajet. Onyń bári – sabaq, tájirıbe», – deı kelip ýnıversıtet basshylyǵyna, barsha ustazdarǵa alǵysyn jetkizdi. Aldaǵy ýaqytta jeńis týyn tikteýge bar kúsh-jigerin salatynyn aıtyp, aǵynan jaryldy.
