Nur-Múbarak ýnıversıtetinde jańa oqý jylyna daıyndyq pysyqtaldy (FOTO)
Almatydaǵy Nur-Múbarak ýnıversıtetinde jańa oqý jylyna daıyndyq barysy jan-jaqty pysyqtaldy.
Prorektor, dotsent Qaırat Qurmanabev ýnıversıtettiń departament, bólim basshylary men kafedra meńgerýshileri aldynda pandemııa jaǵdaıyndaǵy ekinshi oqý jylynyń erekshelikterine toqtaldy. Stýdentterdiń onlaın, oflaın oqý júıesine qatysty rettiligi, dárister ereksheligi, ekpe barysy men «Ashyq» qosymshasy arqyly qaýipsizdik sharalaryn qamtamasyz etý máseleleri talqylandy. Sanıtarlyq talaptar ǵana emes, stýdentterdiń salaýatty ómir saltyn ustanýy da ózekti ekenin alǵa tartqan prorektor, dotsent Qaırat Qurmanbaev:
«Bul kimge bolsa da kúızelisti kúsheıtetin stressti jaǵdaı. Al psıhologııalyq álsizdiktiń ózi aýrýǵa jol ashatyny ras. Sondyqtan stýdentterge qoldaýmen qatar, salaýatty ómir saltyn ustanýy, ashanadaǵy as mázirine erekshe mán berip, sapaly tamaqtanýdyń da mańyzdylyǵyn túsindirýimiz qajet. Sebebi adamnyń ımmýnıtetin kóterý arqyly kóp indetke qarsy turýǵa bolatyny belgili. Indetke qarsy kúres keshendi túrde júzege asyrýǵa mán berý qajet», – dedi.
Sondaı-aq ujymdy jańadan qyzmetke kirisken prorektor keńesshisi Erlan Nadırshın men Tárbıe jáne áleýmettik damý departamentiniń basshysy Maqsat Baızaqpen tanystyryp, olarǵa sáttilik tiledi.
Ýnıversıtettiń damý jumystary jan-jaqty talqylanǵan májiliste Sapa menedjment júıesi bóliminiń meńgerýshisi qaým.professor Shamshat Ádilbaeva: «Kafedralar, kýrator-Edvaızerler jumysyn kúsheıtý, kitaphana, oqý zalynyń tehnologııalyq múmkindikterin damytyp, sharýashylylyq bólimi, ıaǵnı ýnıversıtettiń barlyq salasyna qatysty jeke-jeke usynystar bar. Qazirgi oqý onlaın júıesi birshama qosymsha mindettemeler men qajettilikter týyndatyp otyr» dep ýnıversıtettiń bilim sapasyn arttyrý men menedjmentke qatysty túıtkilderge toqtaldy.
Bıyl Nur-Múbarak ýnıversıtetine ıslamtaný, dintaný, teologııa jáne shetel tili: eki shetel tili mamandyqtary boıynsha bakalavrıat baǵdarlamasymen 700-deı talapker qujat tapsyrǵan bolatyn. Al QR Bilim jáne ǵylym mınıstrligi tarapynan bólingen 200 bilim grantynyń 180-in ýnıversıtet talapkerleri jeńip aldy.
Islamtaný, dintaný salasy boıynsha magıstratýra baǵdarlamasyna tapsyrǵan 100-ge jýyq úmitkerdiń joǵary bal ıeleri 51 memlekettik bilim grantyn enshiledi. Sondaı-aq bıyl doktorantýraǵa 15 úmitker qujat tapsyrdy.
